劉輝峰

劉輝峰（Huifeng “Haha” Liu）係中國在澳商人，喺2020年被揭發所領導嘅組織收受中國駐墨爾本總領事館嘅資金，畀澳洲安全情報局評估為對澳洲國家安全構成風險，而受到澳洲媒體關注。

早年生涯

劉輝峰曾經係中國人民解放軍嘅一員，2014年開始喺澳洲居住。2016年，佢喺澳洲有份成立一個名為澳洲緊急互援協會（Australian Emergency Assistance Association Incorporated）嘅華人組織，仲擔任埋主席。

根據佢自己喺中國內地網站西瓜視頻嘅自我介紹入面，佢仲係澳洲製造直通車國際集團嘅董事長。

參與澳洲政治

佢亦係澳洲自由黨嘅捐助者，另外亦同聯邦自由黨議員廖嬋娥仲有助理財長蘇卡（Michael Sukkar）建立咗聯繫，廖嬋娥亦曾經公開推廣澳洲緊急互援協會。佢亦曾經以澳洲緊急互援協會嘅名義，關注中國在澳留學生精神健康，虛擬綁架等其他方面嘅問題。

組織內部糾紛，被揭發涉及中國政府滲透

佢同澳洲自由黨多個主要成員嘅互動，令佢喺2016年已經引起澳洲安全情報局嘅注意。

喺2020年9月，移民部長拒絕咗佢嘅重大投資者永居簽證申請後，但係法庭就准許對佢嘅驅逐出境令暫緩執行。

喺2020年11月，澳洲緊急互援協會爆發內部糾紛，常務副會長亢震指控劉輝峰喺管理協會期間，違反協會法定章程、唔公開賬目、唔經選舉私自連任4年、用不實信息同形像對外宣傳、同埋商務上股東合作嘅糾紛等，當中亦提及到佢申請移民未獲得批准，之後劉輝峰亦都有發表聲明反駁。

去到2021年1月，澳洲嘅傳媒報導，澳洲緊急互援協會被揭發同中國駐墨爾本總領館達成協議，收取嘅總領館資金，從而同總領館分享唔同嘅資料。針對劉輝峰嘅執法行動，除咗澳洲安全情報局之外，仲有聯邦警察嘅參與。

事件引起澳洲政界譁然，前新州廉政公署律師維遜（Geoffrey Watson SC）直指，首相莫理遜應該清除自由黨內嘅外國滲透，炒咗廖嬋娥，又話滲透已經達到部長級。斯威本科技大學中國專家 John Fitzgerald 就話，大使館雖然有責任保護中國公民，但佢哋無責任，亦唔可以干擾澳洲華人嘅社區事務。