劍橋

  想搵其它同名嘅地名嘅話，請睇劍橋 (搞清楚)。

劍橋（粵拼：gim3 kiu4；英文：Cambridge），以前譯成康橋，係英國英格蘭東區域劍橋郡嘅城市、自治市鎮-非都市區，係英國最耐歷史嘅大學城。劍橋建立喺康河之上，喺倫敦以北約八十公里。二零一一年英國人口普查顯示佢有人口約十二萬四千人，其中約二萬五千人係學生。有考古學證據顯示早喺青銅器時代劍橋已有人聚居，之後喺羅馬同維京時期成為咗重要嘅貿易中心。十二世紀皇家特許狀授予劍橋城鎮嘅地位，但佢現今城市嘅地位喺一九五一年先被正式授予。

劍橋 Cambridge
徽章
劍橋
國家	英國
建立	公元1世紀
面積
• 總計	40.7 平方公里（15.7 平方英里）
人口（2011）
• 總計	123,867
• 密度	3,000/平方公里（7,900/平方英里）
郵政號碼	CB
電話字頭	01223
網站	www.cambridge.gov.uk

Cambridge

世界知名嘅劍橋大學一二零九年喺劍橋創立。大學嘅建築包括國王學院禮拜堂、卡文迪許實驗室同埋劍橋大學圖書館。劍橋大學圖書館係世上最大嘅法定送存圖書館之一。劍橋嘅天際線主要係幾個大學學院嘅建築，亦包括聖母暨英格蘭殉道聖人堂嘅尖塔、阿登布魯克醫院嘅煙囪同埋聖約翰學院禮拜堂嘅尖塔。安格里亞魯斯金大學嘅主要校址都喺劍橋，呢間大學演變自劍橋藝術學院（Cambridge School of Art）同埋劍橋郡科藝學院（Cambridgeshire College of Arts and Technology）。劍橋亦係所謂矽沼地（Silicon Fen）嘅中心，包含諸如軟件同生物科學等等各種高科技產業同埋各樣劍橋大學間接帶動嘅新創企業。多於四成嘅劍橋勞動人口擁有高等教學學位，係國家平均嘅兩倍。世上最大嘅生物醫學研究集中地之一嘅劍橋生物醫學園區（Cambridge Biomedical Campus），就嚟成為阿斯利康製藥同埋柏特沃斯醫院（Papworth Hospital）新址嘅所在地。

劍橋嘅帕克公園（Parker's Piece）係世上第一場現代足球比賽嘅舉行地點。劍橋嘅仲夏公地（Midsummer Common）係仲夏遊樂會（Midsummer Fairs）同埋有稱為士多啤梨遊樂會（Strawberry Fair）嘅音樂藝術節嘅所在地。一年一度嘅劍橋啤酒節喺耶穌綠地（Jesus Green）舉行。劍橋喺M11同A14公路嘅側邊，而劍橋火車站距離倫敦國王十字車站唔夠一個鐘車程。

喺劍橋，除咗劍橋大學建築之外，重有商店、公園、茶藝館，同埋代表劍橋現代化一面嘅百貨公司，商店同埋運動設施。