北京奧運鼓樓殺人案

 北京奧運鼓樓殺人案（粵拼：bak1 gin1 ou3 wan6 gu2 lau4 saat3 jan4 on3） 係中國北京喺2008年8月9號發生嘅殺人案。嗰日一位喺浙江杭州嚟嘅旅客用匕首刺向人，導致美國遊客一死一傷、同埋一位中國大陸導遊受重傷。事後兇手跳樓自殺死咗。

由於呢單嘢喺北京夏奧期間發生，加上喺中國大陸好少有針對鬼佬嘅惡性犯罪事件發生，所以單嘢引起多國媒體關注。

經過

2008年8月9號，嗰時北京夏奧會啱開幕第二日。嗰日喺北京東城區鐘鼓樓，有位喺中國浙江杭州嚟嘅47歲男旅客同平時一樣喺度玩鼓樓景區，附近班四合院啲居民冚唪唥都喺度睇緊女子48kg級嘅舉重比賽直播。期間唐永明掹出把匕首，喺鼓樓城樓二樓將兩位美國明尼蘇達州達科他縣嚟嘅兩位旅客斬咗幾刀，重斬埋一位中國大陸女導遊。唐永明喺喐手後即刻跳樓自殺。受傷嗰兩位美國遊客同一位女導遊亦俾白車第一時間送到北京市協和醫院搶救。

事發幾個鐘之後，鐘鼓樓閂檔唔做生意，有幾位紅袖章嘅老坑喺案發現場附近巡邏，重猛咁要求啲人唔好七加一，及要求附近居民同店主唔好講埋嗮啲唔三唔四嘅言論。有附近啲居民話現場有好多血跡。而附近啲商舖班店主都話出噉單嘢時，佢哋都唔喺舖入面做生意或好忙，甚至重有人話電視機播奧運節目好大聲，乜都聽唔到。

而喺鐘鼓樓景區嘅北廣場，有好多部攝影機同相機放嗮喺度，專門搞事發現場嘅突發事件直播同報道。

後續

事發後，美國駐北京總領事館高度關注呢單殺人案，使館發言人包日強（Richard Buangan）話同中國大陸官方正式調查單嘢嘅詳細來龍去脈，而大使館同白宮爲受害家屬提供一切所需協助。當地差佬亦調查咗下案發現場留低落嚟身份證同護照，證實最先係唐永明喐手。事件亦令美國奧委會委員長——彼得·尤比洛斯同美國總統小布殊都一齊悼念呢單命案嘅死難者。

據調查，唐永明只不過係普通嘅居民，1961年3月4號出世，曾經喺杭州市儀錶廠做過嘢，平時去到杭州市茶市街一間棋牌室打下啤牌，落崗後重試過喺傳達室做把守，亦試過兩次離婚；亦有喺儀錶廠嘅舊同事話唐永明成日發姣，話社會唔公平。據浙江警方通報，佢嘅仔唐文駿有案底，試過先後喺2007年5月因詐騙罪而俾公安機關行政拘留10日；2008年3月4號因偷嘢而被判半年監禁兼罰咗CNY￥2000。事發後有網友質疑唐永明係嚟北京上訪定係實行恐怖襲擊行為，亦有美國官員擔心呢單案係唔係專程對付美國佬而實施嘅犯罪行為。後嚟調查過下，呢單純屬普通嘅殺人案，既唔關信訪事，又唔關奧運會恐怖襲擊事，更加唔係針對美國佬嘅有組織犯罪行為，加上唐永明之前冇任何犯罪前科。而受害嗰兩人係托德巴赫曼同芭芭拉芭赫曼，係美國前女排球員—伊利沙伯·芭赫曼嘅阿爸阿媽，尤其係托德巴赫曼，係美國排球隊前教練——曉·麥吉俊嘅外父。

不過托德巴赫曼被送到醫院後證實不治，芭芭拉芭赫曼喺住院五日後轉運返到美國繼續接受治療。而鼓樓景區亦因為噉嘅殺人案而連續閂檔62日，直到2008年10月10號先至重新開業。鐘鼓樓景區重新開業後加強咗安保，專門排查每位入場人士有冇攜帶啲危險品入場。