十個童女嘅比喻

十個童女嘅比喻係耶穌講嘅一個比喻，記載喺《新約聖經》《馬太福音》第25章第11至13節。

聖經譯文

「	嗰日，天國好比以下嘅故事：有十個童女手裏拎住油燈，出去迎接新郎。其中五個係愚蠢嘅，五個係聰明嘅。愚蠢嘅帶備燈，不過冇足夠嘅油；聰明嘅帶備燈，另外又帶油。新郎遲來，佢哋都眼瞓，瞓着咗。到半夜，有人呼叫話：「新郎到喇，你哋出去迎接佢啦！」十個童女就起身，整好佢哋嘅燈。嗰時，愚蠢嘅對聰明嘅話：「唔該分一啲油畀我哋， 因為我哋嘅燈就嚟熄喇。」聰明嘅答話：「對唔住，我哋嘅油實在唔夠分畀你哋，你哋自己去舖頭買啦。」愚蠢嘅童女去買油嘅時候，新郎就到。五個有準備嘅童女一齊入去，同赴婚宴，門就閂咗。其他嘅童女隨後亦到；佢哋叫話：「先生，先生，請開門畀我哋！」新郎答話：「我實在話你哋知，我唔識你哋。」耶穌話：「所以，你哋要警醒；因為你哋唔知嗰個日子，嗰個時間係幾時到。」	」
——《馬太福音》25章第11至13節

背景

當時巴勒斯坦地嘅風俗習慣。喺大喜嘅日子，新郎由兄弟同朋友陪伴住行勻成條村嘅大街小巷，接受每一戶人家嘅祝賀。然後，佢重要去新娘屋企接新娘，所以返到村嘅時候可能已經係三更半夜。

內容

十可以睇做整數，係指所有信徒，原文中「童女」係指未婚嘅童女或童男，原意係童身，十個童女手裏拎住油燈等候新郎，因為新郎遲來，十個童女都瞓着咗，聰明嘅童女都瞓咗，不過佢哋有預備足夠嘅油，所以半夜新郎來嘅時候，燈重係着嘅。呢個比喻話畀我哋知接近末日嘅時候，因為信徒肉體嘅軟弱，靈性會鬆懈，不過儆醒嘅信徒保持同上帝嘅靈交，讓聖靈充滿，有好行為嘅表現而發出亮光。愚蠢嘅童女雖然都拎住油燈，不過冇預備油，因此當佢哋醒過嚟嘅時候，發覺燈啲油就快用完，只好要求聰明嘅童女分一啲油畀佢哋。

解釋

童女事先唔知道新郎來到嘅準確時間，同樣信徒亦唔知主幾時會再來。聰明嘅童女喺等待期間有充分嘅準備，得到享受婚筵之樂。而愚拙童女懈怠唔儆醒，被拒於門外。呢度提醒信徒必須多方準備，儆醒等候，以免將來被主責備，後悔莫及。