博勃瀚
博勃瀚（法文名︰Paul-Émile Lecoq de Boisbaudran，1838年4月18號—1912年5月28號）係法國一個化學家。
祖先本來係新教貴族，好有錢。但係後來法王路易十四廢除咗南特敕令，驅逐新教徒，於是就家道中落。直到佢阿爸，就喺干邑做商人。佢阿媽好有教養，親自教授博勃瀚各國語文，於是佢就學識咗英文。大個咗，博勃瀚去咗巴黎綜合理工學院求學，而且自己整咗個實驗室，成果唔錯。佢早年所得，包括提取鎵等等，都喺呢度進行。
一開初，博勃瀚專攻超飽和溶液，知道同晶鹽可以毀壞超飽和溶液嘅穩定性。後來改為主攻光譜學，研究稀土元素。佢先用本生燈火焰、電火花加喺各個元素度，前後試咗35種，分析佢哋個光譜，搵出佢哋嘅其異；然後按圖索驥，陸續搵到釤、鏑、銪呢三種鑭系元素，佢哋都係稀土元素。
博勃瀚眾多研究中，以發現鎵最為有名。1875年，佢喺52公斤鋅礦石樣本裏面，見到新光譜線，提取到氯化鎵幾毫克。跟住佢用咗好多好多礦石，終於攞到75克鎵，重計埋鎵個原子質量。因為咁，博勃瀚獲頒法國榮譽軍團勳章、戴維獎章同埋法郎成萬蚊。1888年，獲選為英國皇家學會外籍成員。
鎵嘅重要性，係在於佢證實咗元素週期表嘅推斷。1871年，門捷列夫，週期表嘅創製人，話喺週期表裏面，鋁下底重有元素，重推論埋佢個性質。到博勃瀚搵到鎵，研究佢個性質，合乎門捷列夫個推論，證實咗佢講嘅嘢係啱嘅。
開初，週期表係無貴氣體呢一族嘅。1894年，氬氣呢樣嘢俾人搵到，博勃瀚即刻話，氬同其他元素唔同，應該要另開一族，即係而家嘅貴氣體族（第十八族）。
1895年起，博勃瀚週身病痛，又畀家事纏憂，於是就唔再點研究。1912年5月28日病死，享年74歲。