反射

喺物理學上，反射（粵拼：faan2 se6；英文：reflection / to reflect）係指波動嘅波陣面（wavefront）喺兩隻唔同介質之間嘅位改變方向，並去返返去原本嗰隻介質裏面。舉個例說明，想像家陣有條光線通過空氣（介質 1）前進，跟住射落去一塊鏡嘅表面（塊鏡表面嘅玻璃係介質 2），當條光線去到空氣同玻璃之間嘅位嗰時，條光線嘅一部份會變方向射返過去空氣（介質 1）嗰邊；而當由一件物體射過嚟嘅光喺塊鏡嘅表面反射並且進入觀察者對眼嗰度嘅時候，觀察者就會喺鏡所反射嘅鏡像。

奧巴馬企喺塊鏡前面，由佢嗰度嚟嘅光射落塊鏡度跟住反射返轉頭，令佢見到鏡入面嘅自己。

反射現象嘅抽象圖解；$\theta _{r}=\theta _{i}$
入射角等於反射角。

上述嘅過程可以抽象化嘅幾何概念嚟諗。光嘅反射會遵從反射定律：根據反射定律，當一條光射落去一塊表面嗰度嗰陣，反射嘅光同入射嘅光會成特定嘅角度；想像一條光線 ${\text{P}}$ 通過空氣射落去一塊鏡嗰度，射中塊鏡上面嘅點 ${\text{O}}$；反射定律講嘅係，反射嘅光線 ${\text{Q}}$ 同條法線（normal；指同塊鏡嘅表面成垂直嘅線）會成角度 $\theta _{r}$，而且 $\theta _{r}=\theta _{i}$，當中 $\theta _{i}$ 係 ${\text{P}}$ 同法線成嘅角度；簡單講，即係反射角等於入射角。

種類

按介質嘅特點，可以分為：

• 鏡射
  • 喺平滑嘅表面反射，反射嗰陣反射角會以同一個方向進行，會出現清晰嘅影像。
• 漫射
  • 喺粗嚡嘅表面反射，各條光線嘅反射角，方向會好亂，影像亦好模糊。

但係唔理係鏡射定漫射，影像都同真實物體倒轉。

事例

• 鏡照出嘅影像係反射嘅典型例子。
• 平靜嘅水面亦都可以產生反射現象。

睇埋

• 反射定律
• 折射
• 折射定律