口述影像
口述影像（英文：audio description 或 descriptive video service）係一項專為盲人或視障人士提供嘅服務，透過運用簡潔同精準嘅言詞，將影像轉為語言描述。視障人士因為視力問題睇唔清楚甚至睇唔到視覺資訊，口述影像幫助佢哋理解影像中嘅內容。
簡介 編輯
簡單嚟講，口述影像就係將「睇見」嘅「講」出嚟。應用範圍包括：電視、電影、博物館展覽、自然景觀、書本插圖文字解說等，任何視覺屬性嘅傳播媒介訊息都有機會用到。口述影像主要分為「預錄口述影像」同「現場口述影像」，口述影像員會利用簡潔、生動嘅語言，將影像訊息描述，傳達畀視障人士，協助佢哋理解影像中嘅內容。以電影口述影像為例，口述影像員要喺盡量唔干擾對白、聲效、背景音樂嘅情況之下，描述演員嘅表情、動作、場景等。