台海飛彈危機

台灣海峽飛彈危機（英文：Third Taiwan Strait Crisis），又稱第三次台灣海峽危機或1996年台海危機，係指1996年發生於海峽兩岸之間嘅一連串緊張事件。

海峽兩岸關係自1980年代中國大陸改革開放後以經濟交流為主，本嚟已經越嚟越和緩。1990年代初因為東歐、蘇聯嘅劇變情勢，加上六四天安門屠殺事件導致中國大陸同美國嘅關係惡化，美國唔再需要中國大陸對抗蘇聯，反而拉攏台灣對抗中國大陸，兩邊嘅政治關係愈嚟愈緊張，不過當時經濟關係並無受到實質影響。

1995年，台灣總統李登輝訪問美國，引起中國大陸不滿，中國大陸為咗阻止李登輝在1996年嘅總統選舉中連任，就進行一連串以武力威懾台灣嘅軍事演習，結果引發咗危機。中國人民解放軍嘅第二砲兵部隊同南京軍區分別向台灣外海發射飛彈，舉行兩棲登陸作戰演習，而美國就緊急調動兩個航母戰鬥群進入台灣海峽，海峽一度陷入戰爭嘅狀態。中國大陸當時試圖用武力威懾嘅行為干涉1996年嘅台灣總統選舉，不過最終喺首次公民直接選舉中，李登輝成功當選連任台灣總統。