吉野

吉野（粵拼：gat1 je5；日文：吉野よしの^(Yoshino)）係指過去日本大和國南部一帶（而家奈良縣嘅南部）嘅地方名，廣義嘅範圍包括而家嘅吉野郡下嘅大淀町、下市町、吉野町、上北山村、川上村、黑瀧村、下北山村、天川村、十津川村、野迫川村、東吉野村、五條市南部嘅西吉野町地區同大塔町地區。狹義嘅範圍就特別係指吉野山到大峰山之間嘅山區；喺日本嘅歷史書《古事記》同《日本書紀》都有記載應神天皇同雄略天皇喺吉野狩獵嘅傳統。

地理

春天嘅吉野山

吉野位於紀伊半島中部、奈良盆地以南嘅紀伊山地之內，呢個區域裏面包括有高地、盆地、山地嘅地形，面積達到2,500平方公里。

吉野又可以分為口吉野同奧吉野，口吉野屬於吉野川流域，吉野川離開山區進入和歌山縣後即為紀之川，最終流入紀伊水道。奧吉野係大峰山以南，接連熊野地區（三重縣南部到和歌山縣東南部之間）嘅大峰山脈周邊山區，呢個區域過去亦稱為大峰，喺其中有由山伏開闢可以通往熊野嘅道路；奧吉野屬於十津川同北山川流域，呢兩條河川都係熊野川嘅支流，喺匯入熊野川之後注入熊野灘。

吉野同熊野地區都係多雨地帶，亦係經常受到颱風侵襲嘅地方。呢個地方係日本主要嘅林業地區，吉野杉同秋田杉、木曾檜合稱為日本三大美林。吉野亦係觀賞櫻花嘅著名景點，但係喺吉野最常見到嘅櫻花係山櫻，而唔係被冠上吉野地名嘅染井吉野櫻。

歷史

「吉野（吉野地方）」嘅範圍喺唔同嘅時代都有唔同。原本嘅吉野指吉野川北岸同龍門山地（高取山・龍門岳）之間嘅原野，喺某啲情況之下，石能只係指吉野山或吉野宮。隨住時間嘅流逝，佢哋已經擴展到南部嘅山區，而家指向奈良縣南部嘅吉野郡地區（包括同五條市合併嘅西吉野村・大塔村）。