吳美雲 (出版家)

吳美雲（1943年—2016年5月12號）係臺灣出版家，創辦「漢聲雜誌社」。

吳美雲
出生日	1943年
死亡日	2016年5月12號
[改維基數據]

  呢篇文講台灣出版家。想搵讚美操創辦人嘅話，請睇吳美雲 (音樂人)‎。

生平

吳美雲喺美國紐約出世，係吳鐵城嘅大孫女，佢阿爸吳幼林係中央信託局嘅官員。

吳美雲喺台北美國學校畢業之後，留學美國同英國。喺俄亥俄州牛津讀西方女子學院（今日嘅邁阿密大學西部校區）嘅時候開始對編輯、出版工作產生興趣。大學三年級嗰陣，擔任校報主編。獲得傅爾布萊特計畫獎學金去英國讀研究所，主修政治戰略學。

1970年，已經有一個仔嘅吳美雲辭去原有工作。佢將屋企浴室改為暗房，喺屋企度創辦漢聲雜誌社。又搵到藝專畢業嘅黃永松同姚孟嘉合作，三個人就夾份編輯雜誌，當時佢哋先至得廿幾歲。佢同黃永松一齊去到舊書攤，研究美國《生活》、《展望》、以及《花花公子》等雜誌嘅版面編排同文章結構，發展出自己雜誌嘅風格。佢一度每日工作十四個鐘、每星期工作七日，一度因為借返嚟嘅資本用盡，幾乎無法如期出書。之後由中華航空決定每期訂購一萬本，畀旅客喺飛機上睇，《ECHO》創刊號喺1971年1月1號推出。《ECHO》係當年率先進行台灣鄉土田野調查嘅報導文學同攝影雜誌，印刷精美，憑住飛機上乘客嘅閱讀而吸引到讀者令到呢本雜誌可以全球銷售，訂戶多達三十三個國家。但係收入仍未足夠，每個合夥人根據個人專長接受其他工作嚟彌補，例如佢曾經先後為國科會編印台灣生活手冊，為觀光局製作七個中國傳統節日嘅影片。

1978年。中文漢聲雜誌面世，法國返嚟嘅奚淞加入團隊，包括之前嘅吳美雲、黃永松、姚孟嘉，漢聲四位重要人物全體成員都到齊。

1980年代，漢聲出版作品源源不絕，有《漢聲中國童話》、《漢聲小百科》、《愛的小小百科》、《精選世界兒童圖畫書》、《精選世界少年文學讀物》等。身為阿媽嘅吳美雲感嘆坊間好多西方童話書，屬於自身文化嘅兒童讀物太少，於是1981年以原創圖文推出《漢聲中國童話》，一套十二本，每日一個故事，再加上為兒童編創嘅科普同生活常識嘅《漢聲小百科》喺1984年面世，呢兩套書成為1970、1980年世代重要嘅啟蒙書，當時臺灣中產家庭經常以呢兩套書作為送畀細路嘅賀禮，重因為太多盜版書，令到吳美雲親自連同警方去捉。

漢聲全盛時期有八百個員工人，傅月庵以「一葉開五花」形容漢聲訓練出嘅人都成咗1990年代臺灣相關出版領域嘅主導力量，例如遠流台灣館、兒童館編輯基本都係嚟自漢聲。

隨住姚孟嘉離世、奚淞退休、黃永松到北京，只係剩返吳美雲獨守衰退嘅出版社。佢有過敏、血壓高、腎盂腎炎、腸潰瘍。2008年，雷曼兄弟金融海嘯爆發嘅時候，佢正病緊，未能及時搶救漢聲嘅財政。2016年5月12號朝早，喺臺北國泰醫院病逝，享年七十二歲。