周門
周門（「門」字有地名變音，粵拼：zau1 mun2）係廣東廣州嘅一條村，地處西關平原北邊，係舊底南海縣荔溪鄉三約之一[1]。而家屬荔灣區彩虹街道，喺中山八路北邊、荔灣路西邊、廣茂鐵路東南邊，村入邊有荔灣圖書館同廣州市西關外國語學校。
史
編輯周門村北有駟馬涌流經；南面地勢平緩，曾經係田。呢條村因爲係周氏族人聚居，所以叫周門。周門舊底亦叫荔灣西約、荔枝灣洲背，係荔溪鄉三約之一。周門村亦係舊荔枝灣故址、南漢御苑，約莫喺南宋咸淳年間開村，村祖係周觀達、周觀定兩兄弟，後人起咗周氏宗祠同議事廳。
周門村喺明清兩代隸屬南海縣金利司恩洲堡。中國民國時期，屬廣州市西禪區。1950年，西禪區併入長壽區，屬廣州市長壽區。1951年，屬廣州市西村區彩虹街。1952年9月，改屬西區，屬廣州市西區彩虹街。1960年5月，屬西區西村人民公社管理委員會；同年8月，西區改名荔灣區。1961年8月，撤社复街，屬荔灣區彩虹街。1985年10月，屬廣州市荔灣區彩虹街西園社區，直到而家[1]。
古蹟
編輯| 名 | 地址 | 現況 |
|---|---|---|
| 北帝廟 | 周門大街26-30號 | 仲有 |
| 土地廟 | 周門一巷2號 | 無咗 |
| 呂祖廟 | 周門村口門樓右 | 無咗 |
| 社公廟 | 周門村口門樓左 | 無咗 |
| 周氏宗祠 | 周門村西北 | 無咗 |
| 荔灣周公祠 | 周門大街 | 無咗 |
交通
編輯往日周門衹能夠行出去大馬路坐車，而今有小巴413路兜入周門。
街巷
編輯- 周門路，東西向，東連荔灣路，西接周門街；
- 周門街，南北向，南連中山八路，北接周門路；
- 周門南路，南連中山八路，向北同周門街交接，又喺周門路口同周門北路交接；
- 周門北路，南連周門路，北接西華路。
- 周門西街，同周門街平行，喺周門街西邊。