味峰侯公祠
22°30′03″N 114°06′43″E / 22.50083°N 114.11194°E
味峰侯公祠（英文：Hau Mei Fung Ancestral Hall），係喺香港金錢村第九巷嘅兩進式設計祠堂，上水侯氏味峰房嘅祖祠。佢大概喺乾隆中後期（1763年-1795年）起，由於味峰房子孫人丁單薄，缺乏財力，所以佢嘅祠堂亦近乎荒廢，喺2002年由香港政府出錢修葺，喺1998年被評爲二級歷史建築，但喺2010年11月10號改評為香港一級歷史建築。祠裏面有兩塊寫住「奉旨其正」同「皇恩浩蕩」嘅匾額，其中一塊「奉旨其正」牌匾係乾隆皇帝賞賜畀金錢村第22代嘅侯倬雲，以表揚佢處事公正嚴明，味峰侯公祠都係由佢起嘅，以紀念佢嘅曾祖父侯聚斐（名味峰），不過原本嘅百年牌匾已係20世紀中唔見咗，目前掛嘅牌匾係重造嘅。
祠堂正廳有兩條粉紅色石柱，相傳係官員專用嘅石材，而家已經揾唔到同類嘅物料進行修復。由於侯倬雲得到皇帝賜封，所以可以喺村裏面豎立一支喺幾十里外都可以睇到寫住「侯」字嘅高旗杆，喺當年經過金錢村嘅較低級官員都需要下馬致敬。嗰嚿豎立旗杆嘅基座距離祠堂唔遠，而家仍然存在，用古法製造，十分堅固，但已經被後人用混凝土堵塞插旗個圓窿[1]。
參考
編輯- ↑ 〈陳天權：《味峰侯公祠》，大公網，2007年3月17日〉。原著喺2017年4月26日歸檔。喺2018年3月14日搵到。