和平紀念日

和平紀念日（英文：Remembrance Day）訂立於每年嘅11月11號，紀念響第一次世界大戰、第二次世界大戰同其他戰爭中犧牲嘅軍人同平民。第一個和平紀念日喺1919年喺大英帝國舉行，原本叫「停戰日」（Armistice Day），喺1919年11月7號由時任國王佐治五世創立，紀念1918年11月11號上晝11點，德意志帝國代表喺康邊停戰協定簽字結束第一次世界大戰。

國殤虞美人花

起源

第一次世界大戰喺1914年爆發既時候，士兵喺歐洲既比利時掘戰壕。第二年（1915年）戰壕同埋周圍既農田同埋荒野都生咗鮮紅既虞美人花海，所以紅色既虞美人花就象徵咗為戰爭而犧牲既人。呢種情景，可以喺加拿大士兵約翰·麥克雷（John McCrae）既詩《在法蘭德斯戰場》（In Flanders Field ）既描述領略到。

紅色虞美人花突然出現既真正原因係，花既種籽深埋咗喺地下，進入休眠狀態。士兵喺比利時既法蘭德斯（Flanders Field）掘戰壕既時候，將啲種籽翻咗上地表，加上1915年比利時既春天比往年暖，因為天氣適合，所以佢哋就發芽、生長、開花。而此情此景，對於嗰啲經歷戰爭既軍人嚟講，可以話係另有一番淒美既感覺。

而戴小紅花呢個傳統係喺第一戰結束後既1921年喺英國開始。嗰年，英國陸軍少校佐治·豪森（Major George Howson）同退伍軍人組織「英國皇家軍團」（英文：Royal British Legion）建議，每個成員都應該做一啲紅色紙花，分發俾公眾，一嚟可以紀念戰爭犧牲咗既人，二嚟可以籌錢去接濟啲處境困難既退伍軍人同埋佢哋既家屬。

英國既傳統

喺英國每年既11月開始，好多英國人（尤其係老一輩既）都會喺心口戴紅色既虞美人花，目的係紀念嗰啲喺一戰（後來紀念埋二戰同埋其他戰爭）裏面犧牲咗既軍人同埋平民。

喺每年既11月11號既11點鐘，英國好多地方既人都會默哀兩分鐘，去紀念戰爭既死難者。

近年有人認為紅色虞美人有美化戰爭既含意，所以佢哋改為戴白色既虞美人花。呢個戴白花既活動最初係由「和平承諾聯盟」（英文：Peace Pledge Union）呢個慈善組織發起既，目的係促進和平。

睇埋

• 歐洲戰爭勝利紀念日