唐詩三百首
《唐詩三百首》係一部流傳好廣嘅唐詩選集。唐朝（618年—907年）二百九十年間，係中國詩歌發展嘅黃金時代，雲蒸霞蔚，名家輩出，唐詩有五萬首咁多。孫琴安《唐詩選本六百種提要·自序》話，「唐詩選本經大量散佚，到今日仲存三百餘種。當中最流行而家傳戶曉嘅，要算係《唐詩三百首》」。《唐詩三百首》選詩範圍係相當廣泛嘅，收錄咗77家詩，總共311首，喺數量以杜甫詩數多，有38首、王維詩29首、李白詩27首、李商隱詩22首。係仿《詩經》三百篇（共311篇）之作，從前係家絃戶誦嘅兒童詩教啟蒙書，所以比較淺顯，讀者容易啲接受，俗語有話：「熟讀唐詩三百首，唔識吟詩也會偷。」係中小學生接觸中國古典詩歌嘅最好入門書籍。
呢本書嘅編者係孫洙，別號蘅堂退士，係江蘇無錫人，清乾隆十六年（1761年）嘅進士。孫洙編選嘅唐詩，係依據沈德潛（1673年—1769年）嘅《唐詩別裁》同埋王士禎（1634年—1711年）嘅《古詩選》、《唐賢三昧集》、《唐人萬首絕句選》為主，雜埋其他唐詩選本。《唐詩三百首》嘅題材廣泛，反映唐代嘅政治矛盾、邊塞軍事、宮閨婦怨、酬酢應制、宦海升沈、隱逸生活等。但係《唐詩三百首》都有一啲遺珠嘅憾覺，例如杜甫《自京赴奉先縣詠懷五百字》、《北征》，白居易《新樂府》同埋皮日休等人嘅作品冇被選入。朱自清寫咗嘅〈唐詩三百首讀法指導大概〉一文，近人金性堯根據《唐詩三百首》重新加注。