黑膠唱盤

唱機或者唱盤pun2（英文：turntable，英文讀音：/ˈtɚnˈteɪbl/），又或者講明係黑膠唱盤，係用來播黑膠碟嘅電器。主要部分包括摩打、金屬圓盤（唱盤）、圓盤上面嘅軟膠墊、唱臂同唱頭，傳統上圓盤上面會有兩三行點，分別對應大碟嘅 33 轉、細碟嘅 45 轉同好少用嘅 78 轉三種標準轉速，本來係用來畀人用肉眼觀測速度啱唔啱，使唔使微調（見到啲點唔郁就即係速度啱），後來有自動測速度嘅唱機，啲點就變咗可有可無。

典型嘅黑膠唱盤，可以見到用來對速度嘅三行白點

唱頭上面有唱針，唱片轉嘅時候同唱針接觸，唱針就會震動，出返原聲，但係呢種聲係細到幾乎聽唔到，要用電路放大。傳統唱盤唔會自己出聲，而係要駁音響組合或者混音器，但係2010年代開始有自己出聲嘅唱盤；而今亦都有 USB 唱盤，將訊號數碼化之後直接傳畀電腦。

唱機嘅前身係留聲機（phonograph），駁音響組合嘅時候，唱機嘅專用接口亦都係寫 Phono。