單曲

單曲（英文：Single）係現代音樂產業入面嘅一種作品發行方式，通常佢錄製嘅歌曲數量要少過密紋唱片同專輯。佢可以以唔同嘅格式分發畀公眾。喺大多數情況下，單曲入面嘅歌曲同專輯係分開出嘅，雖然有時單曲歌曲都會收錄喺專輯入面。來自於專輯嘅單曲歌曲嘅目的通常喺促銷專輯並用喺數碼下載同商業廣播播放，而且呢啲歌係好大機會會係受歡迎嘅。而喺其他情況下，單曲歌曲係唔會收錄到專輯入面嘅。

喺美國用喺自動點唱機嘅45每分鐘轉速並中央帶有大孔嘅單曲唱片。

歷史

單曲最早響十九世紀後期出現，嗰時興由留聲機圓筒播歌，每隻碟最多可以播兩至四分鐘。後嚟畀黑膠唱碟取代，但唱片都唔可以播太長。後嚟唱片嘅播放速度由每分鐘16轉去到每分鐘78轉。去到1910年左右10英寸、每分鐘78轉嘅士叻碟成為主流。

名

香港

Single 嘅名響香港黑膠唱碟年代就噉叫「細碟」。

去到八九十年代，香港歌手好興以專輯（即大碟同細碟）嚟賣，好少會以單曲形式賣出嚟。相反，佢哋會主打三吋CD；原因就係當時香港人崇日，但日本歌手興出單曲，同香港嘅慣常做法唔同，所以香港人就搞出三吋CD，呢種三吋CD最大特點係總長度唔超過24分鐘，即相當於收錄五六首歌左右。

依家響香港，對單曲嘅定義偏向係「單一首歌」咁解。

日本

日本係世界上單曲最大嘅市場，響八九十年代仲更加係單曲銷量大過專輯。同歐美、香港等主打專輯嘅市場唔同，日本市場主打單曲，好多歌手會以單曲嚟出道，並且係咁推出單曲嚟增加人氣，響有一定嘅知名度之後先至推出專輯。因為利潤高，賺錢快，當地嘅唱片公司好多時都會通過宣傳嚟提高銷量。

至於日本嘅單曲多數會收錄兩首歌，有一個A面同一個B面，A面即主打歌，B面就係附加歌。有時亦會出現雙A面（即兩個主打歌）同多個B面（即多過一首附加歌）嘅情況。

響興起網上下載啲歌之後，有歌手直頭推出數位限定單曲（即網上嘅單曲），呢點響近年都開始普及。至於點解日本到今時今日都興單曲，有好多人認為係由偶像文化所導致；仲試過有fans用幾千萬日圓去買過萬張單曲，目的就係為咗支持偶像ーーAKB48。

韓國

響韓國，「單曲」嘅定義係指一首以用下載形式先能夠得到嘅歌；專輯就係「實體」發行嘅作品。另外韓國仲有一個獨有術語叫「單曲專輯」。雖然三個詞語意思上好接近，但佢哋響韓國係三種唔同嘅嘢：「單曲專輯」係指一隻包涵多首歌嘅CD、LP等，一定要係實體、摸到嗰隻；「專輯」就係任何嘅實體音樂唱片（英文文法上比較似Record）；而「單曲」一定係指單單一隻歌，而且要係網上發行。響日本、歐美發行嘅「單曲」，由於係實體，所以過到韓國就會變成「單曲專輯」。

「單曲專輯」響九十年代興起，一般會收錄三隻歌，當地人認為係「更加親民同貼地」；響嗰個年代好流行。而韓國當地第一張單曲係搖滾樂隊H2O響1986年發行嘅《안개도시》。雖然之後都有部份歌手試下出單曲，但對樂壇未有影響。隨住2000年過後，數碼限定單曲（即網上嘅單曲）越嚟越興，取代咗「單曲專輯」嘅主流地位。

由於韓國係跟據一隻唱片係唔係實體嚟判斷究竟係單曲定係專輯，所以會發生好多外國人理解唔到嘅嘢：就算一隻唱片收錄得一隻歌，但如果係實體發行嘅話，咁韓國人會判斷佢係「專輯」，而唔係「單曲」。女歌手金請夏嘅專輯《XII》就係一個好例子。雖然呢隻唱片淨係收錄咗《已經12點》一隻歌，但佢都可以登上Gaon專輯排行榜第四名。