回樽

按樽係賣樽裝飲品嘅一個規定。啲嘢飲用樽入住，客人買嘢飲要先畀埋按樽錢（樽嘅按金）。客人飲完懶得理，冇回樽嘅話，按金就俾販商沒收。

按樽按金用意係補償販商損失，而家回樽又叫做環保政策。一般來講，多數都係只會回玻璃樽，而且好多地方嘅回樽制度都只係象徵式，例如：香港只係五毫子港幣一個玻璃樽，美國就十美仙一個樽。不過喺紐西蘭，佢哋採用咗一種叫做「swappa carte」嘅計劃，鼓勵民眾一箱箱咁買飲品之餘，重畀返佢地購買折扣。就以一打樽裝啤酒為例子：一箱12支嘅瀎裝啤酒正價賣紐紙40蚊，但係如果你成箱啤酒樽連埋啤酒箱拿返去，你就可以用紐紙24蚊買返一箱12支嘅補充裝，慳返4成。

不過，亦有地方連膠樽都會回收再用。例如喺日本，就有例子為每個回收返來嘅膠樽退返10至20円。另外，喺瑞典，當地為咗減低塑膠垃圾，所以訂立咗法例規定所有膠樽喺重新變返做膠粒循環再用之前，都要經歷過20年嘅使用期，而生產商有責任生產一個耐用嘅膠樽，同埋負責清洗收返來嘅舊樽嚟再用。為咗鼓勵大眾交返個樽出來，當地都會為膠樽設回樽費。