國際象棋注釋符號

註解者評註國際象棋嘅時候，離唔開一套公認嘅評註符號——用問號同嘆號表示行法好壞嘅系統。常用評註符號由差到好依次為「??」「?」「?!」「!?」「!」同「!!」，佢哋緊接喺行法記錄後面（例如「Re7?」「Kh1!?」），表示一步棋嘅優劣。評註好主觀，同一行法唔同人嘅評註未必相同。註解者評估行法嘅時候會考慮棋手棋力，例如新手行錯棋可能唔做標記，但係特級大師行同一步就可能被評為「??」。此外，註解者評註嘅時候都有可能參考對局嘅實際結果；呢種傾向有時稱爲「按結果評註」。

評註符號

行法評註符號由劣到優依次為：

??（極差）

雙問號「??」代表極差，即係犯咗好大嘅錯誤。錯失賺大棋或者將死良機嘅行法就屬於典型劣着。劣着級行法往往直接導致棋手喪失局勢。呢個符號偶爾表示勝勢轉和局嘅行法，又或者註解者覺得棋手水平唔應該犯呢個錯誤。人類即使係最高等級嘅棋手都會行劣着，但係電腦程序只有特別初級嘅先會犯明顯錯誤。