埠
起喺港灣、畀船停泊嘅設施
(由埗跳轉過嚟)
呢篇文章講嘅係一般意義嘅碼頭/渡口，總覽可以睇《碼頭》一文。 「船口」跳轉到呢度。想搵其他用法，請睇「船口 (搞清楚)」。 想搵電腦通訊嘅埠嘅話，請睇連接埠。埠（粵拼：bou6*2（白讀），fau6（文讀）；俗寫埗）、埠頭（bou6 tau4*2），係畀船停泊嘅地方，又叫碼頭（maa5 tau4）。埠本義船上落客貨之處，後來意思擴展成綜合而言嘅埠，成個地方可以好幾個泊位。啲埠一般起喺港灣，可以畀乘客上落船，亦可以畀貨物出入貨或者裝卸處理。
_arp.jpg)
埠並不單單只有上落之處，碼頭邊亦有平地，夠位放住貨同行李，以及畀人停留。一般來講，有順岸碼頭，平地後有貨倉，以便出入貨。客運有梯級上落。埠並不單只有順岸碼頭，有時會有打直伸入水嘅樁柱碼頭，如橋，可以放多幾個泊位。
名
編輯用呢個字嘅詞語包括：到埠、抵埠、埠頭。埠呢個詞後來擴大意思，等同於城市。
香港九龍西面有個地區叫「深水埠」（通當變調讀bou2）。當年英國人想記錄低呢個地名，不過，負責嘅華藉員工雖然識字，但係就只限於書面語，對粵語正字無乜研究。佢知道嗰處叫「深水bou6」，但係就唔知個bou6字點樣寫（佢可能連bou6字嘅意思都唔多清楚），以為係有音無字，於是乎就跟住形聲字嘅章法，整咗個「埗」字出來。
最初，電腦繁體字大五碼無呢一個字，搞到好多香港人覺得好唔方便，唔想用電腦造字咁麻煩，就索性打「土步」算數。後來統一碼收錄埋「埗」字，隨住統一碼嘅普及，呢個問題亦都慢慢消失，而大家亦當正「埗」字係中文正字，本字係「埠」就唔多人知喇。
bou6呢個白讀音，歷史源遠流長，可以追溯到古漢語，呢個音響口語、地名裏面保留落來。其它旁證，包括客家讀音bu1（客英字典、臺灣四縣、海陸豐）/pu1（陸豐）[1]、官話讀音bù、韓語讀音부（bu）。
其實，寫「埠」更切合呢個字嘅意思，即使外省人都會睇得明。
