基督少年軍
基督少年軍（英文：The Boys' Brigade）係一個基督教青少年制服團體，1883年喺蘇格蘭創立，而家喺世界各地都設有分支。
起源 編輯
基督少年軍源自英國，係歷史上第一個青少年制服組織，創辦人威廉‧亞歷山大‧史勿夫爵士喺年輕嘅時候係教會嘅一位主日學老師。佢覺得傳統嘅主日學模式難以滿足少年人嘅好奇心同好動嘅個性，所以善用佢義勇軍人嘅背景，將團隊精神同軍事紀律融合喺宗教活動之中，以更多元化嘅方式教育少年人。史勿夫爵士喺1883年10月4號召集咗大概60位少年人，喺格拉斯哥嘅學院自由教會舉行集隊儀式。時至今日，基督少年軍已經成為國際性宣教運動，喺世界各地約大概有60多個國家有基督少年軍組織嘅成立[1]。
世界性發展 編輯
基督少年軍喺1883年創立，1887年傳到美國，1889年傳到加拿大，1891年傳到澳洲，1889年傳到南非。基督少年軍嘅概念亦被唔少歐洲國家採納，尤其是喺北歐、丹麥、瑞典、芬蘭等亦有成立類似基督少年軍嘅組織。但係直至1950至1960年代，基督少年軍嘅世界性發展先算係最大，分隊紛紛喺太平洋島嶼、東亞洲、非洲、加勒比海等一帶陸續成立。基督少年軍亦喺1959年喺香港成立第一支分隊。基督少年軍遍佈世界超過五十多個國家，成員差唔多有五十萬[2]。