外交承認

外交承認係一種喺外交嘅行動，表示一個國家知道並且同意另外一個國家或者政體嘅存在。外交承認可以係事實上，亦可以只係法理上承認。當一個國家受到部分國家認同，但係仍然有唔少國家拒絕承認，就會出現部分承認嘅情況。

一般嘅外交承認可以係通過宣言直接咁承認，亦可以係通過和約或者做官方拜訪嚟表示承認一個國家嘅存在。通常當一個國家攞到外交承認之後，就可以參與唔同嘅國際組織。

自從聯合國建立以嚟，一個國家嘅存在，一般都係通過佢喺聯合國嘅地位嚟決定。當一個國家喺聯合國投票同意另外一個國家成爲聯合國成員嘅時候，已經自動表示喺外交上承認咗呢個國家。但係相反，如果一個國家拒絕喺聯合國上同意另外一個國家加入，唔一定係因爲唔承認，亦有可能係有其佢因素，例如未達到某一個規定。

除此之外，一個國家可以唔承認另外一個國家嘅行動，但係仍然可以保留對呢個國家嘅外交承認。一個國家可以承認另外一個國家嘅存在，但係反對佢做嘅行動。

睇埋