外顯記憶
外顯記憶（粵拼：oi6 hin2 gei3 jik1；英文：declarative memory / explicit memory）係指有意識、（喺識講嘢嘅人當中）有得用口頭報告返出嚟嘅記憶[1]。外顯記憶有得細分做語義記憶（semantic memory）同情節記憶（episodic memory）兩種[2]。語義記憶係指一啲唔受時間地點影響嘅記憶，例如係一個人對數理事實嘅記憶（「我記得進化論講嘅係乜乜乜」）；而情節記憶就係指一啲會掕住時間地點嘅記憶，例如係一個人對某件發生喺某個時空嘅事嘅記憶（「我記得阿爸今朝臨出門口之前講過，話佢今晚會夜啲返屋企」）。神經科學實驗顯示，兩種外顯記憶所涉及嘅腦區有重疊但唔係完全一樣[3]。
兩種外顯記憶對人嚟講都好緊要：語義記憶對人各方面嘅學習嚟講不可或缺，有佢一個人先至能夠記住同運用各種嘅知識；而情節記憶就令到人曉同人相處（「我記得呢個人之前喺邊年邊月幫過我，係一個信得過嘅人；而嗰個人之前喺邊年邊月呃過我，唔好再信佢」），而且仲係一個人嘅人格嘅基礎－情節記憶令到一個人具有自傳式記憶（autobiographic memory），能夠記得（例如）佢嘅初吻、第一日返學發生嘅事、以及係同伴侶喺邊度邂逅呀噉[2]。