大台理論

《大台理論》本來係ViuTV電視劇《IT狗》入面一本書，但由於《IT狗》劇情提到呢本書嘅內容令好多人聯想起無綫電視嘅劇集，結果呢個詞語亦成為咗一啲人揶揄無綫電視劇情節老土，無乜變化嘅詞語。

關於大台理論喺劇集入面嘅內容

喺《IT狗》入面，呢本書由Lokman（楊樂文）飾演嘅星之子Tony 經常手持由他親自撰寫嘅書本《大台理論》，頭頭是道咁講佢口中嘅道理。而去到2022年1月26號嘅一集，Tony甚至一路跟住佢嘅理論，去嘗試中途截糊，阻止對手公司PayPayEgg同雅典娜婚禮策劃公司，過程入面星之子Tony不停咁引述《大台理論》嘅內容，推敲事情會點發展落去，但佢口中講嘅橋段同可能性，就被認為同無綫劇集好接近。不過，Tony最後都係冇辦法促成雅典娜同自己公司PayPayDuck合作。

各方面嘅反應評論

喺劇集出街後，好多人聯想起同無綫劇集有關嘅批評，引起咗一啲網民嘅討論，甚至係《IT狗》製作團隊嘅回應。

製作團隊

《IT狗》嘅監製羅耀輝（Andy）之後接受傳媒訪問拆解《大台理論》嘅來由，話係導演同編審一齊諗出嚟，好早劇本已經有，用嚟配合Tony星之子嘅角色上面，因為佢係個好講理論、好自信嘅人，咁樣件事會好好玩。至於被問到係咪揶揄無綫電視橋段老土，佢就話係喜劇效果，希望活化大台常用嘅橋段。

網絡評論

• 有網民就揀咗一啲無綫電視劇必然出現嘅橋段：當中包括全香港得一間差館（西九龍重案組）、主角不論背景屋企都會好大、分手同心事情節都會喺中環9號碼頭取景、BBQ大結局、紀律部隊相關劇集結局往往係再出動戴黑超齊齊大步走、講秘密一定有人喺隔離偷聽、吳卓羲一定係衝動、爭執嗌交戲好多時會撞車收場、千年不變嘅對白（「你肚唔肚餓啊，不如我煮個麵比你食重」、「你聽我解釋先啦」）、咩電視劇都有三角戀或四角戀同埋炒車一定會漏油爆炸。
• 亦有網民話，如果無綫開拍《IT狗》，結果只會出現「C drive上網大法」，只有頭幾集同IT有關，其他都係三角戀甚至上錯床嘅橋段。

影視評論人反應

• 影視評論人游大東喺社交媒體表示，自己想要一啲劇集周邊嘅產品，特別係《大台理論》呢本書，更加話希望借助群眾力量達成件事。

文化影響

• 喺呢個名詞興起後，有啲批評或揶揄無綫電視嘅人，喺提到無綫劇集情節無新意嘅時候，都會引用呢個字詞。例如Facebook專頁「大台監察2.0」曾經喺批評無綫劇集《雙生陌生人》嘅時候，就批評橋段同以前一樣，又係一人分飾二角，性格各異，走唔同嘅路，揶揄係貫徹《大台理論》。
• 東薈城名店倉喺2022年4月推出，由林家𤋮同樊沛珈演出嘅社交媒體廣告亦再大玩《大台理論》。