天安門母親運動

天安門母親運動係一個要求中國共產黨平反八九民運嘅組織。佢係由前中國人民大學哲學系副教授、六四事件死難者家屬丁子霖等人發起、聯同一班喺六四天安門事件入面遇害者嘅媽媽組成，佢哋呼籲徹查同公布「六四」事件同向死傷者家人同公開道歉。呢個組織同埋成員成日受到中共有關當局嘅阻撓同刁難，包括唔准公開悼念「六四」遇害親人等等。

丁子霖係天安門母親嘅發起人同埋話事人

目的

呢場運動喺2000年正式展開，佢哋要求：

1. 死難者家屬有權公開悼念喺六四事件入面死咗嘅親人；
2. 死難者家屬同傷殘者有權接受各界人道援助捐款；
3. 停止迫害六四事件嘅傷殘者同死難者家屬；
4. 釋放所有因為八九民動被捕、家下重入緊冊嘅政治犯；
5. 公開六四真相，追究事件責任。

阻撓

丁子霖、張先玲（無咗19歲嘅仔）同黃金平（無咗30歲嘅老公）喺2004年3月畀人拉咗。當局最初死口唔認，但之後話佢哋「參與外國勢力支持嘅非法活动」。佢哋喺禮拜尾獲釋放，但直到六四事件15周年前夕都畀當局監視。佢哋嘅支持者話佢哋畀當局軟禁咗。佢哋嘅電話畀人偷聽，重冇得同其他活躍分子、外地傳媒、人權組織講嘢。

活動情況

2007年8月，緬甸爆發反軍政府示威。9月29號，天安門母親嘅丁子霖、張先玲等127人，發表聲明，「佢哋作為1989年北京六四慘案死难者嘅親屬，一直關注缅甸嘅事態發展，非常之同情死難者同佢哋嘅親屬，憤怒譴責軍政府暴行，警告佢哋要即刻停手。」佢哋話，「好似六四咁樣嘅血腥屠殺，再唔可以喺中國同埋世界任何地方發生。」佢哋重同中國政府講：「請你哋喺緬甸問題上放棄曖昧態度同睇似不偏不倚嘅扮嘢態度，而係要企喺正義立場對暴政進行嚴正制裁同譴責，同國際社會合作，喺緬甸危機入面發揮正面嘅大國影響力。」同時，天安門母親要求緬甸軍政府立即放棄暴力，恢復反對黨領袖昂山素姬嘅自由，開放新聞，解除壓制，啟動民主，達成全民和解。

政府使橫手

2010年12月16號，「天安門母親」發表聲明，家下喺鄉下無錫住緊嘅丁子霖兩公婆同外界失去聯絡。自從10月份諾貝爾和平獎公佈，佢哋嘅電話、手機和互聯網通訊畀人cut嗮。聲明要求政府當局，撤銷軟禁，恢復佢哋嘅公民權利，畀佢哋返北京醫病。

睇埋

• 五月廣場母親
• 別斯蘭母親 - 別斯蘭人質危機
• 白衣女士

出面網頁

• 天安門母親官方網站
• 天安門母親運動
• 天安門母親運動（香港）