天河公園

天河公園（粵拼：tin1 ho4 gung1 jyun4*2），又叫東郊公園（dung1 gaau1 gung1 jyun4*2），係廣東廣州天河區員村一個公園，喺1928年起好。南邊挨住黃埔大道中，西邊挨住天府路，北邊挨住中山大道西，東邊係天河軟件園南區。

敘述

公園總面積係70.2公頃。中間有個湖，面積10公頃。公園入面有好多草坪、丘陵、林木，仲有兩個園林，攞過第廿二屆世界博覽園金獎嘅粵暉園同日本園林博覽會金獎嘅粵秀園。鄧世昌衣冠冢亦喺呢度。

公園內有得扒艇，仲有兒童樂園、游水池、餐廳、士多等設施。

公園落成嗰陣叫做「石牌林場」。1933年改名做「中山公園」。1951年，成個公園搞咗綠化造林，並劃分成中山林場、中山農場、中山果園等。1957年改做「森林公園」，1962年改做「東郊公園」。1997年先至改成「天河公園」。