委內瑞拉玻利華

委內瑞拉玻利華（西班牙文：Bolívar）係委內瑞拉嘅通貨，個名嚟自拉丁美洲革命家同軍事家斯文玻利華，1879年開始用。

佢初時行銀本位，後來改行金本位，之後喺1930至1940年代試過同美金掛鉤。1983年2月18號之前，佢係南美地區最穩定嘅貨幣^[1]。

其後委內瑞拉玻利華開始急劇貶值。2003年2月5號，委內瑞拉開始外匯管制以限制資金流出；2008年1月1號推出強勢玻利華（Bolívar fuerte），以1,000玻利華兌1強勢玻利華；2018年8月20號再推出主權玻利華（Bolívar soberano），以100,000強勢玻利華兌1主權玻利華。不過呢啲政策都未能阻止玻利華貶值。2021年10月1號委內瑞拉另外推出數碼玻利華（Bolívar digital），比率係1,000,000主權玻利華兌1數碼玻利華。