字形

字形（英文：glyph）喺排版同平面設計，係指字符嘅某特定嘅實際形狀，即係話喺是但一隻編碼系統（例如統一碼）入面，一個基本符號可能有唔同寫法或者唔同樣，而當中某個特定嘅樣就叫字形。

用數學公式定義嘅向量字形

羅馬字母 a 嘅唔同字形

字形係一個電腦排版嘅概念；喺活字印刷，對應嘅係一種叫字粒嘅實物。

編碼同字形

喺個別嘅字款，可能唔係個個字形都有編碼。以中日韓書寫系統做例，譬如用一隻日本出嘅字款（臺灣出嘅字款通常冇咁嘅功能），喺 InDesign 打一個 ｢港｣ 字，右下角會係一個 ｢己｣，但係假設用緊嘅係東亞版嘅 InDesign，我哋可以選咗個 ｢港｣ 字再改設定做傳統字，個字右下就變咗 ｢巳｣；兩個字喺編碼上冇變（即係兩個之中有一個可能冇編碼），但係兩個係唔同嘅字形，喺套字款入面係由兩個唔同名嘅函數定義。

喺比較複雜嘅書寫系統，同一個字符可能視乎佢喺個字嘅邊個位會唔同樣，例如喺阿剌伯文，字母 ه（haaʾ）單丁寫寫 ﻩ，喺字頭寫 ﻫ，喺中間寫 ﻬ，喺尾寫 ﻪ，但係打字嘅時候唔會特別打，即係編碼冇變，但係唔單止要用唔同嘅字形來顯示每個唔同嘅樣，個操作系統仲要䀹住個有家有冇打多咗個字母，要將熒幕上已經顯示咗嘅字形隨時換做第個字形。