孟嘗君

孟嘗君（?—前279年），本名田文，「戰國四公子」之一。佢係齊國宗室大臣，齊威王個孫，靖郭君田嬰個仔，憑佢多門客而出名，佢有三千名門客。

佢喺前299年俾秦國招攬做宰相。前298年，由於秦國大臣擔心佢因為本身係齊國人，做事一定會考慮齊國嘅利益，於是俾秦昭襄王追殺。好彩佢有一位門客識得扮狗潛入秦宮庫藏，偷咗狐白裘出嚟，就叫秦王嘅寵姬向秦王求情，最後田文被釋放。點知後來秦王後悔，派兵去捉佢返秦國，田文喺夜半去到函谷關，關法規定一定要喺日出之時先可以開門，但又未到時辰。有位門客就扮雞叫，於是一大班雞就叫。最終順利走出函谷關，經趙國返齊國。