孟浩然

孟浩然（689年—740年^[1]），名浩，字浩然，號孟山人，以字行，大唐襄州（今湖北襄陽）人，又稱孟襄陽，盛唐時期著名詩人，屬於山水田園派。孟浩然後生時曾遊歷四方，所以後人稱佢做孟鹿門、鹿門處士，同王維並稱為王孟。

生平

唐玄宗在位時嘅開元十五年（727年）冬天，孟浩然去長安想搵官做，第二年應考進士失敗咗。王維曾經向唐玄宗推薦孟浩然，點知孟浩然嘅一句詩《不才明主棄》，搞到唐玄宗好唔高興，失去咗喺朝廷做官嘅機會。

開元十七年（729年）孟浩然漫遊吳越。開元二十年（732年）返到襄陽。

開元二十二年（734年）孟浩然又再去長安。韓朝宗好欣賞孟浩然，於是邀請佢參加飲宴，並且向朝廷推薦佢，點知孟浩然因為同朋友飲酒而錯過咗同韓朝宗嘅約定。

開元二十三年（735年）孟浩然遊蜀。

開元二十五年（737年），張九齡做荊州長史，招孟浩然做幕府。無幾耐，孟浩然返去老家。開元二十八年（740年），王昌齡遊襄陽，探訪孟浩然，兩個人見面好開心。咁啱孟浩然病疹發背，本來就快好返，但係因為佢縱情飲酒，食鮮疾發逝世^[2]。

孟浩然嘅詩歌絕大部分都係五言律詩，題材大多關於山水田園和隱逸、旅行等內容。佢同王維、李白、張九齡好老友，繼陶淵明、謝靈運、謝朓之後，開盛唐山水詩嘅先聲。出名嘅詩作有《秋登萬山寄張五》、《過故人莊》、《春曉》等篇。

孟浩然嘅詩同王維齊名，並稱「王孟」。依家通行嘅《孟浩然集》收詩263首，但其中有其他人嘅作品。

李白對孟浩然極為崇拜，曾經作過幾首詩送畀大自己十二歲嘅孟浩然，最著名嘅一首係《贈孟浩然》：「吾愛孟夫子，風流天下聞。紅顏棄軒冕，白首臥松雲。醉月頻中聖，迷花不事君。高山安可仰，徒此揖清芬。」

孟浩然墓喺湖北襄陽城東風林南麓。