宣和畫譜

《宣和畫譜》係北宋既時候，公元1119 至1125年間（宣和年間），宋徽宗下令編撰既宮廷藏畫既記錄。宋朝喺建國初年就好重視古書、古畫既採集同埋收藏既工作。宋徽宗既時候，內府收藏既書畫數量日益增加，內容豐富，所以就將宮廷所有收藏既歷代著名畫家編成目錄，叫做《宣和畫譜》，總共有20卷，用做日後查考。套書係喺公元1120年（宣和庚子）完成，總共收集咗由魏晉去到北宋既231個畫家既作品，總共6,396件。佢哋將啲畫，依照種類，分成道釋、人物、宮室、番族、龍魚、山水、畜獸、花鳥、墨竹、蔬果總共10門，每門仲有一篇短文，介紹嗰門畫既起源、發展、代表人物等，然後依年代先後排列畫家既小傳同埋佢哋既作品。，不過有人提出，呢套書既內容有啲自相矛盾既地方。其中卷十二〈山水門〉第三仲提及日本國畫，張醜既《清河書畫舫》卷三咁講：「宣和書畫二譜，自是當時大帳簿，鋪敘雖工，其於品題鑑定，則未也」。另外，《宣和畫譜》並無收錄《清明上河圖》同埋《千里江山圖》、《江山秋色圖》等出名既畫作。

《宣和畫譜》雖然屬於著錄性質既書，但係從佢對每門畫既介紹，同埋對每個畫家既評論、小傳既資料嚟睇，可以話已經大大超出咗著錄既範圍，甚至可以話有繪畫史論既性質。從呢個角度睇，《宣和畫譜》可以話既係宋代宮廷所收集、收藏既畫作既記錄，又係一部傳記體既繪畫通史。呢套書既藝術觀點同埋對畫家既評論，相當詳情、精確同埋有用。呢套書對收錄既作品既要求係「以不彷前人，而物之情態形色俱若自然，筆韻高簡為工」，而且強調作品既立意同埋格調。

刊本演流

《宣和畫譜》出版既年代大約係宋高宗期間，《宣和畫譜》有一套姐妹作《宣和書譜》，可惜兩宋期間，好少人提過呢兩套書，佢哋既最早版本亦都已經失傳咗。公元1302年（元朝大德六年）吳文貴既杭州刊本係第二次翻印版本，公元1540年（明朝嘉靖十九年）楊慎第三次翻印咗佢哋，清朝既張海鵬就將佢哋收錄咗喺《學津討原》。