將進酒

將進酒係大唐詩人李白寫嘅詩，類入七言樂府。

背景

寫呢首詩嘅時候，李白仕途失意，懷才不遇，轉投酒樂，借詩意言志，唔想做聖賢，只想交朋結友，一醉解千愁。

正文

『

將進酒 李白 君不見黃河之水天上來，奔流到海不復回？ 君不見高堂明鏡悲白髮，朝如青絲暮成雪？ 人生得意須盡歡，莫使金樽空對月。 天生我材必有用，千金散盡還復來。 烹羊宰牛且為樂，會須一飲三百杯。 岑夫子，丹邱生，將進酒，君莫停。 與君歌一曲，請君為我傾耳聽。 鐘鼓饌玉不足貴，但願長醉不用醒。 古來聖賢皆寂寞，唯有飲者留其名。 陳王昔時宴平樂，斗酒十千恣歡謔。 主人何為言少錢，徑須沽取對君酌。 五花馬，千金裘， 呼兒將出換美酒，與爾同銷萬古愁。

』

意思

睇唔睇到呀？
黃河嘅水好似係天上邊倒落嚟，一野衝咗落海返唔到轉頭！
睇唔睇到呀？
廳中間嘅鏡照到嘅白頭髮，朝早重黑鼆鼆嘅頭髮挨晚就變咗白雪雪。
人生在世點都要玩盡佢，千祈唔好畀個酒樽白白咁對住個月光。
上天畀我嘅才華一定有用，就算啲錢散晒都會返番嚟。
煮羊煮牛嚟食令大家開心盡興，最緊要飲多啲。
岑夫子，丹丘生，拎酒飲，唔好停。
等我為你哋唱首歌，請你哋豎起隻耳聽我唱。
貴族豪門嘅生活唔駛諗，淨係想爛醉唔想醒番。
自古以嚟聖賢都冇人理，飲酒飲到爛嘅人先出名。
陳王曹植想當年喺平樂觀大排宴席，用個斗𢳂酒萬吓萬吓放恣咁玩。
阿兄台你點解話冇錢呀，直接了當拎啲酒嚟我同你飲咗佢。
你隻五花靚馬，同值千金嘅皮草，
叫你個童僕拎去賣咗佢，買啲靚酒返黎，等我同你一齊消解萬古嘅愁緒佢。

評論

宋人嚴羽評咁講：「蓋他人作詩用筆想！太白但用胸口一噴即是。」