尼夫帝

尼夫帝nei4 fu1 dai3（英文：Nefertem）係古埃及嘅蓮花之神，孟菲斯嘅主神普塔同埋戰鬥女神錫蜜個仔。

形象

尼夫帝通常俾人描述為一個頭戴有兩枝羽毛蓮花頭冠嘅年輕男性，有時亦會直接被描繪成蓮花。埃及人仲會將佢塑造成一個獅頭人身嘅男性，頭頂有隻戴住蓮花冠嘅隼鷹。

根據孟菲斯創世神話記載，普塔令「原初混沌之水」努恩生咗一朵蓮花。呢朵蓮花後嚟變成太陽，照耀世界，而尼夫帝就係呢朵蓮花嘅化身。所以尼夫帝亦具有太陽神嘅神格。

另外，尼夫帝同荷魯斯結合，成為霍露·赫克奴（Hor-Hekenu），同戰神蒙特並肩作戰，對抗西特。而且佢身為錫密個仔，有「撕裂獸食敵人之獅」嘅稱號，可見尼夫帝雖然唔係主司戰爭嘅神，但依然係一位幾有攻擊性嘅神祇。

除咗太陽神、戰鬥嘅神之外，尼夫帝亦負責將昇天嘅靈魂引導去雅盧。身為蓮花嘅化身，尼夫帝亦同農耕、豐收嘅信仰有啲牽連，佢被稱為「食物嘅主人」，掌管作物、香料、香油嘅生產，相傳佢仲可以運用呢啲嘢嚟施展魔法，治療疾病。

尼夫帝嘅信仰源自下埃及尼羅河三角洲地帶。呢度嘅民眾將佢奉為下埃及皇冠嘅守護神，後嚟因為普塔信仰嘅興起，尼夫帝被吸收成為普塔個仔。

成為咗普塔個仔之後，尼夫帝獲得諸如太陽神、食物神等等嘅神格。但係對佢嘅信仰始終都係普塔嘅附屬，所以埃及係冇專屬於尼夫帝嘅神殿。喺祭祀亦都一樣，尼夫帝喺祭典露面嘅機會唔多。