山東快書
山東快書係一種說唱曲藝嘅曲種，發源喺中國山東省魯中南同魯西南地區。山東快書嘅唱詞基本上係七字句嘅韻文，穿插一啲過口白、夾白或者較長嘅說白。風格生動鬼馬兼表情誇張同節奏快，最多人用嚟演說英雄人物除暴安良嘅故事。
起源 編輯
關於山東快書起源有兩個講法，一個係話清朝咸豐年間一個喺山東濟寧嘅藝人叫趙大桅，佢改編咗當時著名山東大鼓藝人何老鳳嘅「捽韁腔」，之後又用梨花大鼓做擊節樂器﹐就形成山東快書前身「武老二」。又有人話係山東落子說唱武松故事演變而成。
風格 編輯
山東快書嘅曲最多就係講武松故事，所以又有人叫佢做「說武老二」。但係亦有啲用嚟氹人開心嘅曲好似《大實話》、《柿子筐》，都係比較輕鬆同生鬼。
形式 編輯
基本上山東快書係用山東話唱，用兩塊半圓形嘅鐵板做擊節道具，所以又叫「鐵板快書」，後來有人改用竹板，就變成「竹板快書」。
快板 編輯
快板有啲似急口令，啲詞多數好繞口，而且對啲詞嘅要求好嚴格。
竹板快書 編輯
竹板快書又叫做快板書，係喺快板基礎上演變而成，喺平、津一帶流行。竹板快書同快板主分別在於題材同演唱嘅音調。另外啲詞亦比較輕鬆，可以好自由同即興咁發揮。
數來寶 編輯
最初係啲乞兒喺啲鋪頭門口演唱乞錢嘅技藝，數來寶個「數」，即係指帶有節奏性嘅念白，「寶」即係指錢，即係：「數住唱就來寶」咁解。後來有啲藝人將佢改良變成劇場表演藝術。數來寶有佢基本句式，即係「上六下七」，上句六字，下句七字。上下兩句最後一個字一定要合轍押韻，而且係同一聲調[1]。