山水畫

山水畫（粵音：saan1 seoi2 waa2）係國畫其中一個最重要嘅分支，起源於劉宋。山水畫所畫嘅係山以及河同湖等嘅水體，山水畫強調「平遠」、「高遠」同「深遠」多過闊遠，喺視覺上，山水畫有以下多種特性：

• 山水畫會運用散點透視，想要做到「漫步喺山路上」噉嘅效果，令睇畫嘅人可以一路行一路睇，焦點不斷變換，往往會畫出非常長嘅畫卷；
• 「深遠」就係運用遠近山嘅形狀同深淡做對比，畫出立體同山谷深邃嘅效果；
• 除此之外，山水畫亦好重視「意境」，即係唔執著要準確噉畫出事物嘅外形（同西洋畫嘅寫實主義大相逕庭），而係要用雲同霧等嘅景象加埋畫入面嘅人跡（例如係隱士居住嘅一間屋仔）表達出山水嘅主觀實像，呢點被指係體現咗道家嘅思想。

山水畫呢家嘢喺日本畫同韓國畫當中都見得到。

用西洋畫嘅詞彙嚟講，山水畫可以算係風景畫嘅一種。

特徵

睇埋：風景畫

唔拘泥於物體本身嘅真實性，而重在佢背後嘅主觀真實，「山川使我為山川言」，呢個係中國山水畫一個非常重要嘅特徵。

由古代開始，中國嘅山水畫嘅特點係一定要有人或者建築出現喺畫上，呢幅畫先至顯得有生氣；日本古代雖然都係學習中國畫嘅技法，但日本嘅風景畫始終冇人或者動物出現，顯示嘅係寧靜嘅氣氛；歐洲就直到文藝復興時期先至出現作為人物背景嘅風景，到咗17世紀先至開始有純粹嘅風景畫。

技巧

睇埋：水墨畫

一般嚟講，山水畫嘅技巧包括咗「勾」、「皴」、「擦」、「染」同「點」五個步驟：首先用墨線勾出山石嘅輪廓，然後用各種皴法畫出山石嘅明暗向背，然後用淡墨渲染，進一步加強山石嘅立體感，最後再用濃墨或者鮮明嘅顏色點出石頭上嘅青苔或者遠山嘅樹木。

作品

• 
  宋朝人郭熙
  《早春圖》
• 
  宋朝人馬遠
  《山徑春行圖》
• 
  元朝人髙克恭一作
• 
  19 世紀日本畫家橋本雅邦
  《月夜山水》

睇埋

• 國畫