巴拿馬文件

巴拿馬文件（英文：Panama Papers）係巴拿馬Mossack Fonseca律師事務所嘅大量機密文件喺2016年俾國際調查記者同盟（ICIJ）踢爆嘅洩漏事件。文件包含Mossack Fonseca由1970年代開始，列出有關21.4萬間同離岸金融公司夾埋1150萬筆嘅詳細資料，連各國政治人同班精英未曝光嘅海外資產都揭穿埋。南德意志報喺2015年收到一位未知身份嘅人嘅文件之後，將佢同國際調查記者同盟分享，後者動用嚟自全世界80個國家同地區，107個媒體組織，用一年時間整理啲文件，2016年4月3號公布初步結果。而完整清單會喺同年五月初正式公布。

被洩漏嘅文件揭示國際權貴精英係點用避稅港嚟㔷埋啲錢。英國廣播公司話文件內容波及到全球72位前任或現任國家元首、政府首腦或佢哋屋企人，其中包括冰島總理、烏克蘭總統、英國首相嘅老竇——伊恩卡梅倫同埋中國共產黨中央委員會總書記習近平嘅姐夫——鄧家貴等人。ICIJ同時承認，設立離岸公司唔代表當事人一定有透過離岸公司搞非法活動；南德日報話開設離岸公司係種無可厚非嘅商業行為，捲入巴拿馬文件漩渦嘅中國高層，可能凈為咗收埋啲錢或隱姓埋名喺中國搞投資嚟賺錢。