巴黎

想搵第個意思，請睇「法國嘅首都」。

巴黎（粵拼：baa¹ lai⁴；法文：Paris/pa.ʁi/ (幫手·個快勞)），人稱花都（faa¹ dou¹），係法國嘅首都，喺法國北部塞納河岸邊，係法蘭西島地區嘅中心。巴黎市區裏面嘅人口2005年估計有215萬3600^[1]。巴黎大都會區人口有993萬^[2]，重有一條兜住巴黎嘅通勤帶，夾埋人口總共有1150萬^[3]，係歐洲人口最多嘅地區之一^[4] 。

巴黎

巴黎喺陸路同河運嘅交叉點使佢喺10世紀嗰陣已經係法國主要城市之一，有好多皇宮，有錢嘅修道院，重有一間大教堂添；喺12世紀嗰陣巴黎已經係歐洲學術同埋藝術嘅主要中心之一。而家，巴黎喺政治、時裝、商業、藝術同埋科學都好有影響力。佢係洲際運輸嘅重要樞杻之一，亦都有大學、體育盛事、歌劇公司同埋世界知名嘅博物館 ^[5]^[6]，每年遊客有超過3000萬 ^[7]。

巴黎地區係法國經濟活動最前端嘅中心。佢喺2005年本地生產總值有4787億歐元（5953億美元），佔咗同一年法國嘅本地生產總值超過四分之一。佢嘅衞城區係歐洲最大嘅商業中心，超過一半嘅法國主要公司同埋世界上最大100間公司中嘅10間嘅總部都喺嗰度 ^[8]。巴黎亦都係好多國際機構嘅總部，例如聯合國教科文組織、經濟合作及發展組織、國際總商會、重有非正式嘅巴黎會。巴黎被認為係世界四大國際都會之一 ^[9]。