帕諾提人

帕諾提人（希臘文：Πανδαι，英文：Pandai）係一個神話傳說中嘅種族。佢哋有對好大嘅耳仔，八隻手指同埋八隻腳指。

帕諾提人

帕諾提人嘅畫像，出自《紐倫堡編年史》

特徵

根據克特西亞斯喺《印度史》嘅記載，帕諾提人嘅耳仔好長，可以掂到手踭，佢哋嘅女性一生之中只會有一個小朋友。人口有三萬人。無論男女都會有白色嘅頭髮同眉毛。男性去到30歲啲毛髮就會生到成身都係，並且開始變黑，去到60歲嘅時候就會完全變曬黑色。而且佢哋有一排好靚嘅牙。老普林尼提及佢哋嘅壽命足足有200歲。

帕諾提人仲非常好戰，相傳曾經有5000個帕諾提弓箭手同矛兵跟隨印度國王遠征。

居住地

帕諾提人住喺印度一個生長住蘆葦嘅山區，不過亦都有講法話佢哋住喺西西里島。

另外，老普林尼仲喺《自然史》講過另外一個叫Panotioi嘅種族，佢哋住喺寒冷嘅北方島嶼。耳仔同樣好大，而且可以當係對翼嚟飛行，仲可以用嚟當被冚。並唔肯定兩者係唔係同一個種族。

流行文化

美國作家雷克·萊爾頓所著嘅《太陽神試煉》（The Trials of Apollo），帕諾提人作為羅馬皇帝卡利古拉嘅傭兵出現。