帝國自由市（德文：Freie und Reichsstädte）係神聖羅馬帝國一種特別城市，唔屬任何一個帝國貴族管轄，而係由神聖羅馬帝國皇帝直轄，有比較多自由同特權。神聖羅馬帝國滅亡後，後繼嘅德意志邦聯得返四個自由市：漢堡、不來梅、呂碧克同法蘭克福，到德意志聯邦共和國成立嗰陣就得返不來梅同漢堡，佢哋用聯邦州形式去維持自由市地位。
