廣州交易會

中共政府喺廣州度舉辦嘅交易博覽會
(由廣交會跳轉過嚟)

中國進出口商品交易會粵拼zung1 gwok3 zeon3 ceot1 hau2 soeng1 ban2 gaau1 jik3 wui2英文China Import and Export Fair);簡稱廣交會gwong2 gaau1 wui2Canton Fair);第個名係廣州交易會gwong2 zau1 gaau1 jik3 wui2);之前嗌過中國出口商品交易會zung1 gwok3 ceot1 hau2 soeng1 ban2 gaau1 jik3 wui2),係由中共商務部同廣東省人民政府聯合主辦,中國對外貿易中心承辦嘅綜合性國際貿易展會,喺1957年4月份始創到而家,開創咗中國大陸當局「展銷結合、看樣成交」嘅外貿形式,成為中共開拓國際市場嘅重要形式,並延續至今。。而華潤就唔單止參與創建咗廣交會,仲長期咁擔當咗組織嘅角色[1]

喺琶洲嘅廣交會展館A區北邊嘅大字,呢啲大字係1974年4月份由郭沫若寫出嚟嘅。
廣交會展館B區,喺琶洲嗰邊。
從1974年開始一直辦到2008年先至唔再辦落去嘅廣交會展館,喺越秀區流花路嗰邊。

呢個大型盛會官方號稱係家陣中國大陸歷史最耐、層次最高、規模最大、商品類最全面、到會客商最多、成交效果最好嘅綜合性國際貿易盛會。呢個大會係一年辦2屆,喺每年嘅春秋季兩個時期舉辦,喺廣州舉辦。

編輯

中華人民共和國成立初,到中蘇交惡時期,中國大陸對外貿易嘅主要目標國係蘇聯同東歐嘅社會主義國家。而韓戰爆發後,世界各國逐步加強咗對大陸嘅經濟制裁同貨物禁運[2]。而為咗拉攏第三世界國家,中共中央嘅有關官員就諗著喺廣州,搞返一個全國嘅商品展覽交流會,計劃請返啲港澳及東南亞、西亞各國嘅商家來捧場,一邊拓展埋大陸同東南亞嘅生意,又順便爭取埋瀛外華商、僑商同東南亞各國商家支持大陸當局,提出埋「在廣州成立永久性、全國性出口商品樣品館」[3]

1956年,係由華潤集團董事長張平喺廣州,籌辦中國出口商品交易會,由中共外貿部向國務院提交咗建議舉辦展會嘅報告,得到咗李先念副總理嘅核准[1]。喺1957年4月25號就正式開搞咗第一屆。喺改革開放前,廣交會係中國大陸對外貿易唯一嘅正式渠道[2][4][5][6]

2006年10月15號,溫家寶喺第100屆廣交會開幕禮暨慶祝大會上話,從2007年第101屆開始,廣交會增加埋入口展區,展會改埋名做「中國進出口商品交易會」。[7]2009年,廣交會取消咗大陸採購商嘅入場禁令,首次搞埋出口轉內銷專場,同年秋季106屆展會重開設埋國內採購中心[2]

介紹 編輯

中國進出口商品交易會入面有48個交易團,有成幾千間資信良好同實力強勁嘅外貿公司、生產企業、科研院所、外商投資、獨資同企業嚟參加。佢有好多種貿易方式。除咗傳統嘅實體成交之外,重有網上交易會響度。

廣交會入面除咗搞出口貿易之外,重搞進口生意同開辦好多種形式嘅經濟技術合作同交流,商檢、保險、運輸、廣告同諮詢等好多種業務活動。

展期 編輯

春交會
  • 第一期:4月15號——19號
  • 第二期:4月23號——27號
  • 第三期:5月1號——5號
秋交會
  • 第一期:10月15號——19號
  • 第二期:10月23號——27號
  • 第三期:10月31號——11月4號

參展範圍 編輯

每屆廣交會都分開咗3期嚟舉辦,而每期都有唔同嘅參展範圍。而佢嘅參展範圍係:

  • 第一期:
    大型機械同設備、小型機械、單車、摩托車、汽車配件、化工產品、五金、工具、車(戶外)、工程機械(戶外)、家用電器、電子消費品、電子電氣產品、電腦同通訊產品、照明產品、建築同裝飾材料、廁所同沖涼房嘅設備、進口展區
  • 第二期:
    餐廚用具、日用陶瓷、工藝陶瓷、家居裝飾品、玻璃工藝品、傢俱、編織同藤鐵工藝品、園林產品、鐵石製品(戶外)、家居用品、個人護理用具、廁所同沖涼房嘅用品、鐘錶眼鏡、玩具、禮品及贈品、節日用品、土特產品
  • 第三期:
    男女裝、童裝、底衫褲、運動裝、休閒服、裘革皮羽絨同製品、服裝飾物同配件、家用紡織品、紡織原料面料、地毯同掛毯、食品、醫藥同保健品、醫療器械、耗材、敷料、體育同旅遊休閒用品、辦公文具、鞋、箱包

展館 編輯

廣交會喺歷史入面出現咗5間展館,曾經搬過4次。

展館名 而家係乜 舉辦年份 屆數
中蘇友好大厦 交易會流花路展館5號館嘅機械大廳 1957年4月——1957年10月 1、2
中國出口商品陳列館
(僑光路嗰邊)
(已經唔響度) 1958年4月——1959年4月 3、4、5
中國出口商品陳列館 海印繽繽廣場 1959年10月——1973年10月 6——34
流花路展館 (重係用緊呢個名) 1974年4月——2008年10月 35——104
琶洲展館 (重係用緊呢個名) 2003年10月——而家 94——而家

參展嘅邀請 編輯

開始搞嘅時候,華潤係參照返香港廠商會、英法日等國博覽會嘅做法,去策劃個活動。華潤仲成立埋外商、華商兩個小組,專門負責邀請啲客戶。而洋商嘅邀請,華潤係透過咗駐港各國領事仲有商務專員去做嘅;港澳同東南亞華商嘅邀請,華潤就由香港中華總商會去代理返。參展客戶名單由審查、匯總到最尾嘅報(當局)批都係由華潤負責嘅。

第一屆之後,華潤係一路擔任著廣交會組委會嘅成員。喺每屆廣交會前,華潤都要向中共外貿部提供返重要客戶嘅邀請名單、港澳地區價格方案同埋需重點照顧嘅對象(名單)。直到1994年啲外商嘅邀請工作,先至轉由廣州外貿中心去做[1]

職能機構 編輯

喺中國進出口商品交易會入面,主要係有以下呢啲職能機構。不過唔同嘅職能機構,工作都唔一樣。呢度寫嘅係中國進出口商品交易會入面出現過嘅主要職能機構:

大會秘書處 編輯

大會秘書處係專門負責以下呢啲:

  • 協調好成個廣交會
  • 組織同協調廣交會入面嘅重大活動
  • 商務部領導同嘉賓到大會嘅接待工作同確定號部、司嘅領導交辦啲事。
  • 負責同廣交會有關信息嘅編號同上報
  • 廣交會各個部門之間嘅文件流轉同機要、保密等文秘管理嘅工作。
  • 統籌現場展覽服務同通訊、財務等配套服務、後勤保障等日常工作。

業務辦公室 編輯

業務辦公室係專門負責以下呢啲:

  • 組織、佈置進、出口成交工作。
  • 負責外貿政策研究、形勢分析,同埋指導進、出口嘅成交統計工作。
  • 指導廣交會展覽嘅成效評估工作,研究同制定廣交會嘅組展工作方案。
  • 組織開展同廣交會有關嘅改革發展調研
  • 負責同廣交會業務有關嘅信息編報同廣交會嘅總結
  • 指導檢查係咪有違規轉畀或亂咁將個展位賣畀第個或智慧財產權嘅侵權行為
  • 聯繫交易團、商協會,協調同展覽有關嘅工作。
  • 指導同推動信息化嘅工作
  • 整一個完善嘅廣交會電子政務系統、電子商務系統同信息服務系統等。

外事辦公室 編輯

外事辦公室係專門負責以下呢啲:

  • 負責廣交會嘅對外交往、外事活動嘅組織同安排。其中包括咗:
    安排交易會領導出面啲嘢嘅活動
    接待請咗嚟呢度訪問嘅外國政府同經貿代表團
    請或協助請出面嘅主講人、駐華使(領)館官員、商會團體或公司代表等參加喺交易會期間辦嘅上面同佢有關嘅會。

政治工作辦公室 編輯

政治工作辦公室係專門負責以下呢啲:

  • 負責廣交會思想政治工作嘅組織、管理同協調。
  • 睇下係咪有違規轉畀或亂咁將個展位賣畀第個參展商嘅嘢

保衛辦公室 編輯

保衛辦公室係專門負責以下呢啲:

  • 廣交會展館同緊要活動嘅安保(實行咗統一嘅組織指揮)
  • 對嚟咗呢個會嘅採購商、中國內地嚟呢度參加大會嘅人員住所同主要活動場所嘅安保(實行咗統一嘅組織指揮)

以上呢啲安保都包括咗:

  • 制定廣交會保衛方案嚟搞好各級公安部門嘅行動,維護廣州地區嘅社會治安而搞好成個廣交會嘅安全良好社會環境。
  • 展館嘅防火安全
  • 維護廣交會展館同佢周邊嘅道路交通秩序嚟保證交通暢順。

新聞辦公室 編輯

新聞辦公室係主要負責以下呢啲:

  • 廣交會期間嘅記者邀請、接待、緊要嘅採訪安排同組織召開新聞發佈會。
  • 編輯出版《中國進出口商品交易會參展商名錄》、《廣交會通訊》嘅中英文版。
  • 收集同整理《輿情快報》
  • 宣傳品嘅發放管理

衛生保障辦辦公室 編輯

衛生保障辦辦公室係專門負責以下呢啲:

  • 統一領導同指揮廣交會嘅衛生保障工作,主要有:
    同衛生行政部門保持密切聯繫
    睇實同留意衛生動態
    制定衛生保障工作方案同衛生防疫情況嘅宣傳口徑
  • 檢查衛生保障措施嘅落實情況
  • 接受病情報告,處理衛生保障工作入面嘅突發事件。
  • 組織、協調衛生防疫力量同其他同佢有關嘅工作。
  • 總結廣交會嘅衛生防疫情況信息嚟寫份簡報

證件服務中心 編輯

證件服務中心係負責以下呢啲:

  • 同中心有關部門負責廣交會嘅證件印證件、整證件、發證件,採樣分析、總結採購商嘅信息資料。
  • 負責規劃完善辦證系統、培訓使用辦證系統同現場管理。

對中共建設事業嘅作用 編輯

(1)每年兩屆嘅交易會出口成交總額,喺同期全大陸出口總額中一路佔咗重要份額,特別係1970年代,佔咗同期全大陸出口總額嘅41.7%。同時每屆交易會都做成一定數嘅入口貿易,為中共政府購入急需嘅物資。

(2)展示「社會主義」「建設成就」同「改革開放」成果嘅重要窗口。每屆交易會展出各種中共主打嘅,具先進水平嘅出口產品(1959~1978年展出過反映「建設成就」嘅非成交產品)。

(3)發展中共同國際嘅貿易、增進同其他客商嘅友好合作。

(4)作為加強對國際市場嘅調查研究,同政權內部各地相互學習產品技術嘅舞台[8]

編輯

  1. 1.0 1.1 1.2 华润与广交会《华润》杂志 华润史系列
  2. 2.0 2.1 2.2 广交会为何被喻为中国外贸走出国门的"风向标"?. 凤凰卫视. 2016年2月22日. 喺2016年2月22日搵到.
  3. 60年:见证广交会的成长 广州私途  广古仔  2018-05-20
  4. . 华润集团. 喺2016年2月22日搵到.
  5. 60年巨大变迁②:消费市场翻天覆地大变化. 中国经济网—《经济日报》. 2009年8月8日. 原著喺2016年2月23日歸檔. 喺2016年2月22日搵到.
  6. 抗战到广交会 华润集团历史全回顾. 南华早报中文网. 2014年4月26日. 原著喺2016年3月3日歸檔. 喺2016年2月22日搵到.
  7. 家宝在第100届"广交会"开幕式暨庆祝大会讲话. 新华网. 2006-10-15. 喺2009-11-08搵到.
  8. 廣州市志·廣交會志

出面網頁 編輯