廣東道站

廣東道站係香港九龍南綫擱置咗唔起嘅車站。

原建議

廣東道站興建方式同起尖東站一樣，掘開廣東道路面。後來，擁有海港城業權嘅九龍倉集團提議將海港城嘅地底停車站改建成車站。建議得到廣東道商戶一致贊成，認為做法可以減少工程期間對商戶嘅損失，起好通車後，又可以帶旺廣東道一帶。

不過當時嘅九廣鐵路公司同埋九龍倉集團喺2004年12月6號正式宣佈，否決起廣東道站嘅可能。因為雙方未能就高達18億港紙嘅拆卸及重建費達成共識。當時九鐵要求九龍倉分擔起廣東道站嘅18億成本，九龍倉認為起公共基礎設施嘅錢唔應該由私人機構承擔[1]。九鐵聲明就透露，廣東道站嘅客量預測比原先估計差，預計加設廣東道站，九龍南綫喺非假日客量只會額外增加17,000人次，整個項目回報率會進一步下降，財務未見樂觀，所以至尋求資金，共同承擔建站費用。

結果

2005年1月7號，特區政府刊憲落實唔起廣東道站。行政長官同行政會議喺2005年6月24號正式通過九龍南綫方案，中途會喺廣東道政府合署西面起柯士甸站，方便去中國客運碼頭坐船過境嘅旅客。