張高麗涉嫌性侵彭帥事件

張高麗涉嫌性侵彭帥事件係2021年11月份曝光嘅，牽涉中共中央政治局常委兼國務院副總理張高麗同中國網球手彭帥嘅性醜聞，亦係少數牽涉國家級運動員同中共最高層嘅中國大陸性侵問題。事件源自彭帥喺微博發文講述張高麗對佢有性侵行爲，又對佢始亂終棄。由於兩個人分別係中國體壇同政壇嘅知名人士，亦係第一次有當事人自我曝光同中國執政高層之間嘅性醜聞事件，呢個帖文隨後引起國際輿論關注。《紐約時報中文網》認為呢個係 Me Too 嘅指控首次觸及中共最高權力階層。

概要

彭帥披露

2021年11月2號，中國網球手彭帥喺社交媒體微博發文，自我披露同前政治局常委兼前副總理張高麗嘅特殊性關系。彭帥話，自十幾年前開始，張高麗就喺天津向彭帥求愛並發展性關系。而當時張高麗喺天津市做緊市委書記。其後張高麗到北京升做中共政治局常委，兩人斷絕聯繫。2018年，退咗休嘅張高麗再次聯繫彭帥，約佢喺北京康銘大廈打波，之後又喺佢屋企向彭帥愛。

當日下晝，彭帥話「一直冇同意」，又為張嘅藕斷絲連感到傷心難過。之後張高麗喺晚餐嗰陣向彭帥講到，「宇宙好大好大，地球就係宇宙嘅一粒沙，我哋人類連一粒沙都冇」，以此試圖說服彭帥「放低思想包袱」。又話會善待彭帥，之後兩人發生性關係。彭帥又指控張高麗老婆康潔對呢一切知情，而且未阻止並接受兩人關係發展，但就係背後對彭帥多次進行言語侮辱。彭帥將康潔嘅行為描述為好像「甄嬛傳嘅皇后一樣」，並表示逐漸為呢段感情感到痛苦：

[...]我覺得自己是一個行屍走肉，裝，每一天都在裝，哪個我才是真的我？

我不該來到這個世界，可又沒有勇氣去死。我好想可以活的簡單點，可事與願違。

——彭帥喺2021年11月2號，微博

呢段關係持續咗七年。彭帥話張高麗喺2021年10月31號向佢表示希望喺11月2號下晝好好傾傾兩人嘅關係。不過 2號當日，張高麗打電話畀彭帥，又話「再聯繫」，又推卸一切。彭帥最終喺悲憤交加情況下決定喺微博發文披露同張嘅經歷，同時彭聲稱知道呢個行無異於飛蛾撲火、以卵擊石。就算係咁，佢話都要講出同張嘅經歷。

上述文章喺微博留咗二十分鐘，之後畀微博官方剷咗；同時彭嘅微博賬號亦被禁言，相關關鍵字成為敏感詞。第二日，事件引起國際輿論關注。

新加坡《聯合早報》曾經刊登一段彭帥接受嘅訪問，當中彭帥否認話自己被性侵，事件引起全球好大關注，但之後BBC 記者馮兆音就揭發，採訪彭帥嘅顧功壘早係 2017 年已經離開《聯合早報》新聞部，轉到銷售部門，而呢份所謂報道，其實係中國官方嘅廣告。

各方反應

中國

• 2021年11月3號，根據彭博社報道，中國外交部發言人汪文斌喺主持例行記者會嗰陣被問到事件，佢話：「我冇聽講過呢件事，呢個唔係一個外交問題」。