後稀缺

後稀缺（英文：post-scarcity）係指一種預想中嘅理想社會：稀缺係現代經濟學上嘅基本概念，指嘅係有限嘅資源同理論上無限嘅慾望之間嘅差異：人類有好多慾望，但就算有現代科技，佢哋手上嘅資源－錢、時間、精神－都梗係有限嘅，好多時佢哋都冇足夠嘅資源達到嗮佢哋想要達到嘅目的，例如一個人唔夠錢買嗮佢想要嘅嘢，唔夠時間做嗮佢想要做嘅嘢... 等等；因為稀缺性嘅問題，人類需要做犧牲，需要放棄某啲嘢，嚟獲得更多佢哋想要嘅資源，亦都因為噉樣而有咗競爭－人同人之間會各自犧牲時間精神等嘅資源嚟爭稀缺嘅嘢。後稀缺社會就係一種預想中嘅社會型式，指稀缺性嘅問題近乎消失－任何人都能夠輕易免費噉得到佢哋想要嘅資源，唔使點樣競爭，而工作變成純粹嘅興趣^[1]。