微模型打仗遊戲
通常嘅玩法係玩家搵柞微型模型返嚟，將微型模型以特定嘅陣式擺喺一塊模擬戰場嘅表面上，以某啲方式決定邊個行先邊個行後（規則上，多數微模型打仗遊戲都係回合制嘅，但都有例外），仲有係點樣攻擊以及擊破對方嘅部隊等（呢啲規則詳情就隻隻微模型打仗遊戲都唔同）；此外，多數微模型打仗遊戲都要玩家用軟尺留意住啲部隊之間嘅距離，因為呢類遊戲係想真實噉模擬打仗，所以規則上實會重視距離同位置等嘅變數，例如可能規則指明，某一個部隊手上武器嘅射程係幾多，唔能夠攻擊距離遠得滯嘅敵軍部隊噉；喺多數嘅微模型打仗遊戲打仗遊戲當中，模型嘅形狀同造型淨係有美學上嘅作用，但都有一啲微模型打仗遊戲嘅規則會在意模型嘅形狀嘅。
概論
編輯呢種遊戲源自於古代軍隊模擬打仗，例如古時嘅將軍同參謀成日都會將一啲棋或者模型等嘅嘢擺喺一個模擬戰場嘅表面上，用嚟思考同解釋場仗要用嘅策略－慢慢就演變成今日嘅微模型打仗遊戲[1][2]。
微模型打仗遊戲嘅一大特色係結合咗玩遊戲同砌模型呢兩個嗜好：好多時，微模型打仗遊戲用嚟代表戰場嘅表面都整得好細緻，令玩家可以睇得到戰場上嘅一草一木，而且呢啲表面同埋玩遊戲用嘅模型好多時可以由玩家嚟親手砌。有啲微模型打仗遊戲，好似係出名嘅戰鎚 40000（Warhammer 40,000）噉，就會出一啲好靚好有型嘅模型俾玩家用嚟玩隻遊戲[1][2]。