德川家康

德川家康（日文：徳川家康；1543年1月31號—1616年6月1號，即天文11年十一月廿六－元和2年四月十七）係日本戰國時代同埋江戶時代嘅人物。佢係江戶幕府嘅第一代征夷大將軍。幼名叫竹千代，長大後叫松平元康。佢喺關原之戰中擊敗石田三成，控制成個日本，佢嘅江戶幕府直到1868年由明治政權代替。

德川家康
姓名原文	徳川家康
出生日	1543年1月31號
出生地	Okazaki Castle
本名	松平竹千代
死亡日	1616年6月1號  （73歲）
死亡地	Sunpu Castle
死因	胃癌
國籍	日本、江戶幕府
識嘅語言	日文
職業	侍
配偶	Tsukiyama-dono、Asahihime、Shimoyama-dono、Yōju-in、Chōshō-in、Lady Saigō、Chaa no Tsubone、Okaji no Kata、Lady Acha、Kame no kata、Yōgen-in、Sutsien-si、Ryoūn-in、Seiunin、Seiei-in、Taieiin、Fushoin、Shinjuin、Rengein、Q24875678、Sanjōshi、Q109658502
仔女	Matsudaira Nobuyasu、德川秀忠、Yūki Hideyasu、Matsudaira Tadayoshi、Matsudaira Tadateru、Matsudaira Matsuchiyo、Matsudaira Senchiyo、Tokugawa Yoshinao、Tokugawa Yorinobu、Tokugawa Yorifusa、Kame-hime、Toku-hime、Furi-hime、Takeda Nobuyoshi、Ichi-hime、Mate-hime、Tobai-in、Suzuki Ichizō、Nagami Sadachika、Matsuhime
家族	Tokugawa clan、Tokugawa family、Matsudaira clan
阿爸	Matsudaira Hirotada
阿媽	Odai no kata
兄弟姊妹	Takehime、市場姫、松平康俊、松平康元、松平定勝
[改維基數據]

經歷

幼年

佢喺三河國岡崎出世，阿爸係第八代當主松平廣忠，阿媽係水野忠政個女，叫於大之方，不過佢阿媽喺佢細個嗰陣受到今川家嘅庇護，因此佢同阿媽已經離別，阿爸廣忠為咗對抗織田信秀，同今川氏結咗盟，竹千代成為人質，被送去駿河嘅駿府。

做人質嘅日子

不過響送到駿府期間，佢俾織田信秀嘅部下擒獲。不過喺兩年後，織田信秀嘅庶長子織田信廣又被廣忠擒獲，於是廣忠提出交換人質嘅條件，雖然當時廣忠已經死咗，但係今川義元唔畀竹千代成為岡崎城主，呢幾年就喺駿府渡過，期間受到義元嘅家臣太原雪齋教育。14歲元服，改名為松平元信，兩年後改名松平元康，同義元嘅姪女築山殿舉行婚禮，元康先至可以返到岡崎城。

桶狹間之戰

桶狹間之戰松平元康率領三河眾成為戰役嘅先鋒，率先突襲敵軍。不過另一邊，當主今川義元喺休息期間被織田信長嘅毛利新助同服部小平太殺死，於是元康返到岡崎城，不過到岡崎城嘅時候，發覺今川家已經放棄呢座城，城入面一個人都冇。於是元康正式從今川家獨立出嚟。

清洲同盟

德川家家紋

1562年，同今川氏嘅今川氏真斷交，改為同織田信長結盟，是為清洲同盟，第二年改名為家康。1566年，平定咗三河領地內嘅一向一揆，統一三河國。同年，從朝廷任命為三河守，並改姓德川。之後家康集中攻擊今川氏嘅領土，間接令到今川氏冇咗大名嘅身份。1570年家康嘅主要地盤由岡崎城搬咗去曳馬嘅濱松城。

同信長共渡苦難

當時幕時將軍足利義昭曾經遊說渠加入信長包圍網嘅行列，義昭賜予副將軍一職，不過家康斷然拒絕。其後家康喺姊川之戰中協助出兵，令到淺井長政同朝倉義景嘅勢力大幅減退。不過1572年嘅三方原之戰對武田信玄大敗，幾乎令到德川家有滅亡危機。好在武田信玄嘅主要目標係上洛，德川家避免咗一次滅亡嘅危機，無耐，武田信玄喺向西途中病死，武田軍返到甲府。兩年後，喺設樂打敗咗武田勝賴，令到武田家勢力大幅衰退。跟住喺1582年由於木曾義仲背叛武田家，令信長開始討伐武田，家康協助信長攻下支城，最終令武田勝賴喺天目山自盡，武田家滅亡，戰後獲得駿河一國領地。

本能寺之變同秀吉嘅決戰

同年，獲得織田信長嘅接見，到安土城一遊，期間家康同佢部份嘅家臣逗留安土城，不過織田信長喺京都俾明智光秀暗算而死，織田領內陷入大亂，當時德川家康仍然近畿領域，有被追殺嘅危險，當時服部半藏提議由伊賀逃離，最終成功逃脫。之後同後北條氏結盟，又積極擴充領土，使到佢成為擁有五國嘅大大名。

羽柴秀吉喺山崎打敗明智光秀後，更喺賤岳之戰打低柴田勝家，而秀吉下一個嘅目標係德川家。羽柴軍同德川軍喺小牧長久手兩地對峙。秀吉派遣突襲隊攻擊家康嘅營地，不過家康事先察覺，將突襲隊總大將羽柴秀次擊退。雖然家康喺小牧長久手之戰打咗一場勝仗。不過收尾秀吉改打織田信雄，信雄卒之同秀吉講和，於是家康亦建議大家都講和，最終將第二仔秀康送咗畀大坂城做人質。

1586年隨秀吉攻打竹佐嘅長宗我部元親同埋越中嘅佐佐成政。點知派鳥居元忠進攻上田城以失敗告終。加埋家臣石川數正忽然出走，投靠咗豐臣秀吉。終於喺10月同秀吉達成咗從屬嘅要求，秀吉嘅亞妹朝日姬成為家康嘅正室。秀吉嘅生母大政所送往岡崎城為人質。10月27號家康去大坂城拜見秀吉，正式達成從屬關係。

秀吉家臣時代

家康喺11月返到濱松，同月，被秀吉分封到駿府等五國嘅領地。喺1590年嘅小田原征伐中，援助秀吉成功包圍小田原城，令到守軍冇交戰就投咗降。之後，秀吉分封關東七國畀渠，渠成咗百萬石嘅大名。之後雖然秀吉派兵出征朝鮮，不過家康以討伐北條嘅殘兵敗將為藉口留低，響德川家嘅名護屋城度做守備工作。

關原之戰

1598年，豐臣秀吉病死。由年僅6歲嘅豐臣秀賴繼位。家康藉機安排自己嘅親屬獲得領地，又同大名安排婚姻。終於引嚟親豐臣嘅家臣不滿，特別係石田三成。自從三成受到七將（加藤清正、福島正則等）兩者關係極度緊張，更傳出有人暗殺家康。終於喺1600年初，東北地方大名上杉景勝嘅家臣直江兼續寫咗直江狀，令到家康好嬲，終於下令所有大名準備討伐會津嘅上杉景勝。不過家康喺去到上野國，收到石田三成以打倒家康為目標，喺佐和山城起兵，家康立即舉行軍議，大部份大名支持討伐三成，於是軍隊折返江戶城，並派遣先鋒先由西進發，調查三成嘅動向。

9月1日家康本隊喺江戶城出發，14號到達美濃，當家康到達後，三成隊離開佐和山城，三成嘅家臣島左近喺杭瀨川擊退咗中村一榮同有馬豐氏嘅迎擊隊。

15號，兩軍喺關原開戰，是為關原之戰，最初嘅戰況對德川軍極為不利，直到中午，戰況先至有變化，家康派遣一隊鐵砲隊對小早川秀秋作恐嚇射擊。最終令到小早川秀秋倒戈，向大谷吉繼嘅陣地殺去，戰況先至有改變，最終東軍贏咗呢場仗。

家康喺關原之戰取勝後，分封領地，將大多數支持西軍嘅大名除封，並安排新領土畀佢嘅支持者，而豐臣家只係得65萬石嘅大名。

就任將軍

1603年，家康喺伏見城招請朝廷嘅人士，並且喺二條城就任將軍，成立江戶幕府，而家康就係江戶幕府嘅第一位將軍，雖然家康喺1606年將將軍嘅位置讓畀三仔德川秀忠，並且以駿府城用嚟隠居嘅地方，但係家康仍然掌握實權，從佢處理岡本大八事件同埋大久保長安事件可見一斑。

大坂之陣

家康雖然安排秀忠其中一個女千姬同豐臣秀賴進行婚姻，不過家康有意消滅豐臣家。終於方銘寺寺鐘起名嘅問題引嚟家康嘅不滿，原因係條目寫咗啲對德川家唔吉利嘅嘢，於是家康嘗試迫使秀賴勸降，但係領內引起好大嘅反彈，終於迫使家康命令所有大名出兵到大坂。1614年12月到爆發大坂冬之陣，不過由於守軍嘅反抗強勁，迫使家康用議和嘅方式，成功令大坂城嘅防禦力大減。

不過由於大坂城無意放棄抵抗，而且重新將城外嘅堀重新起過，終於家康第二次出兵，夏之陣入面，雖然豐臣軍多次派軍隊迎擊，不過德川軍步步進迫，最終喺天王寺岡山之戰擊敗豐臣軍，秀賴喺呢場仗切腹自盡。戰後，家康實行一國一城令同武家諸法度等條例，進一步鞏固幕府嘅領導地位。

病逝

家康喺1616年四月十七喺駿府城病死，享年75歲，佢嘅墓地喺東京都日光東照宮，到佢死後，秀忠先至真正控制江戶幕府。

家族

妻妾

• 正室：築山殿（瀨名，關口親永女）
• 繼室：駿河御前（旭姬，豐臣秀吉妹）
• 側室：長勝院（阿萬之方，小督局，永見吉英個女）
• 側室：西鄉局（阿愛之方）
• 側室：西郡局
• 側室：阿茶局
• 側室：良雲院（阿竹之方，市川昌永個女）
• 側室：下山殿（於都摩之方，秋山虎康個女）
• 側室：於牟須之方（三井吉正個女）
• 側室：於茶阿之方（朝覺院，花井氏個女）
• 側室：阿梶之方（英勝院，太田康資個女）
• 側室：阿龜之方（相應院，志水宗清個女）
• 側室：於萬之方（養珠院，正木邦時個女）
• 側室：阿夏之方（清雲院，長谷川藤直個女）
• 側室：阿梅之方（蓮華院，青木一矩個女）
• 側室：阿六之方（養儼院，黑田直政個女）
• 側室：阿仙之方（泰榮院，宮崎泰景個女）

仔

• 松平信康（1559年—1579年）（母：築山殿）
• 結城秀康（1574年—1607年）（母：小督局）
• 德川秀忠（1579年—1632年）（母：西鄉局）
• 松平忠吉（1580年—1607年）（母：西鄉局）
• 武田信吉（1583年—1603年）（母：於都摩）
• 松平忠輝（1592年—1683年）（母：阿茶局）
• 松千代（1594年—1599年）（母：阿茶局）
• 仙千代（1595年—1600年）（母：阿龜）
• 德川義直（1600年—1650年）（母：阿龜）
• 德川賴宣（1602年—1671年）（母：阿萬）
• 德川賴房（1603年—1661年）（母：阿萬）
• 私生子（未確定）：鈴木一藏（1565年 - ？）
• 私生子：永見貞愛（1574年—1605年）（母：阿萬）
• 私生子：松平民部（1582年—1616年）（母：法光院）
• 私生子：小笠原權之丞（？—1615年）（母：三條氏）
• 私生子（未確定）：土井利勝（1573年—1644年）

女

• 大女：龜姬（1560年—1625年）（母：築山殿）- 奧平信昌室
• 二女：督姬（1565年—1615年）（母：西郡局）- 北條氏直・池田輝政室
• 三女：振姬（1580年—1617年）（母：良雲院）- 蒲生秀行・淺野長晟室
• 四女：松姬（1596年 - 1598年）
• 五女：市姬（1607年—1610年）（母：英勝院）

養子

• 松平家治 - 奧平信昌二仔、家康個孫
• 松平忠政 - 奧平信昌三仔、家康個孫
• 松平忠明 - 奧平信昌四仔、家康個孫
• 良純入道親王 - 後陽成天皇第八皇子

養女

• 小松姬（大倫院）- 本多忠勝女、真田信之室
• 滿天姬（葉縱院）- 松平康元女、福島正之・津輕信牧室
• 榮姬（大涼院）- 保科正直女、黑田長政室
• 阿姬（光照院）- 松平定勝女、山內忠義室
• 蓮姬（長壽院）- 松平康直女、有馬豐氏室
• 國姬（榮壽院）- 本多忠政女、堀忠俊・有馬直純室
• 龜姬（圓照院）- 本多忠政女、小笠原忠真室
• 萬姬（敬台院）- 小笠原秀政女、蜂須賀至鎮室
• 久松院 - 松平康元女、田中忠政・松平成重室
• 淨明院 - 松平康元女、中村一忠・毛利秀元室
• 唐梅院 - 松平康親女、井伊直政室
• 高源院 - 岡部長盛女、鍋島勝茂室
• 清淨院 - 水野忠重女、加藤清正室
• 貞松院 - 保科正直女、小出吉英室
• 名不明 - 松平康元女、松平忠政・菅沼定芳室
• 名不明 - 松平康元女、岡部長盛室

參考

• 德川一族