心選路徑

心選路徑（粵音：sam1 syun2 lou6 ging3）係小路一種，呢種小路未經規劃，不過人同動物因為某啲原因而偏好（心選）行嗰條路徑，於是佢哋就成日忽視規劃好嘅道路去行條路徑，行行吓佢哋腳步造成嘅力學侵蝕就創造咗一條「新路」出嚟。

二〇一一年喺英國一地影到嘅一條心選路徑：路鋪好晒，但啲行人自己揀路徑行，踩到草地多咗條「新路」出嚟。

舉例說明，想像做城市規劃同相關建設嘅人員做好晒規劃，然後仲鋪好埋混凝土道路。但係道路使用者發現條路太長、太曲折，或者係嫌佢有間斷，所以佢哋就索性行落草地，通過捷徑嚟去自己嘅目的地。假如有好多人都噉做，久而久之佢哋腳步造成侵蝕，就會令到草地上好似多咗一條「新路」噉。

特徵

心選路徑喺公園等嘅地方都好常見，成日都會喺草地上面形成。

心選路徑路面受侵蝕嘅闊度同嚴重程度，通常會反映有幾多人同動物使用呢條路。一條心選路徑愈闊愈受侵蝕，就表示條路愈多人用。

圖解

好似下圖噉。下圖係心選路徑嘅抽象圖例：有黃界嘅黑線係鋪好（即係事先規劃咗）嘅路，綠色嗰笪係草地，而啡紅色嗰條係心選路徑。