快速反應事件

快速反應事件（quick time event，簡稱「QTE」）喺電子遊戲嘅一種機制：隻遊戲行行吓，突然要玩家快速噉做某樣簡單嘅工作，而玩家喺呢個 QTE 當中嘅表現會影響遊戲跟住嘅走向。例如係一隻戀愛模擬遊戲，故仔講主角同拍拖對象一齊去睇波，途中個波飛向主角，於是隻遊戲就進入一個 QTE，要玩家有噉快得噉快撳某個掣，如果玩家成功，故仔發展就會變成主角成功接住個波，而如果玩家失敗，故仔就變成主角食波餅。QTE 喺以劇情做主導嘅遊戲，例如戀愛模擬遊戲同互動式小說等，當中好常見。