恆大集團債務危機

恆大集團債務危機係2021年中國大型上市公司恆大集團發生嘅債務危機。截至2021年9月，恆大嘅債務超過3000億美金。

背景

2016年10月，恆大集團宣布會借殼「深圳經濟特區房地產（集團）股份有限公司」(000029.SZ，簡稱「深深房」)，分拆恆大地產回歸大陸Ａ股上市。2017年3月，恆大引入咗人民幣1,300億元嘅戰略投資，涉及27個投資協議，包括蘇寧電器等。但借殼計劃一直到2020年都未能成事，深深房自2016年9月14號起停牌，已超過4年，2020年9月21號，深深房公吿話，仲會繼續停牌。

債務成分同規模

恆大集團欠供應商、債權人同投資者總計1.9665萬億元人民幣（合3000多億美金），大致相當於中國國內生產總值嘅2%。恆大2021年6月30號公布嘅年中財報顯示，恆大淨負債率達99.8%。

處理

2021年9月29號，恆大集團宣佈出售盛京銀行19.93%股權畀瀋陽市一間國企，合共作價99.93億元人民幣，全部用作償還對盛京銀行嘅債務。

據知情人士透露，恆大創辦人許家印為咗避免美債違約，10月已出售2架私人飛機，套現超過5000萬美金，而目前正準備為另一架大型飛機搵買主。

違約風波

2021年12月3號，恆大集團喺香港交易所發布無法履行2.6億美金擔保責任嘅公告，公司話自從2021年9月份以嚟，集團積極同財務顧問同埋法律顧問評估公司嘅資本架構同流動性情況，探索所有可行方案，又同境外債權人一直保持溝通，鑒於目前嘅流動性情況，集團唔確定係唔係擁有充足資金繼續履行財務責任。當晚，廣東省政府官員約談恆大集團創辦人許家印。為咗有效化解風險，廣東省政府同意向恆大地產派出工作組，督促推進企業風險處置工作，切實加強內控管理，維護正常經營。中國人民銀行負責人話，恆大集團出現風險主要源於自身經營不善、盲目擴張；中國銀保監會新聞發言人話，銀保監會關注到恆大集團對一筆境外債券未能履行擔保義務，呢個係市場經濟入面嘅個案現象；中國證監會有關負責人介紹，恆大集團經營管理不善、盲目多元化擴張，最終導致風險暴發，屬於個案風險。

影響

恆大嘅債務危機造成咗全球股市唔同跌幅。日經225指數下跌超過2%，美國道瓊斯指數9月20號下跌1.8%、德國DAX指數下跌2.3%，法國CAC4下跌1.7%。