恩寧路

恩寧路（粵拼：jan1 ning4 lou6）係廣東省廣州市荔灣區嘅一條一般嘅馬路，1931年開始整。成條馬路係西北-東南走向，西北邊從龍津西路同埋多寶路嘅交界開始，一直向東南噊過彎去到第十甫路同寶華路嘅交界嗰頭。喺依家嘅廣州入邊，恩寧路係有著最完整同最長嘅騎樓街，呢度係近代廣州粵劇曲藝、武朮醫藥、民間手工藝等傳統文化傳承遺跡最密集嘅地區之一。喺千禧年後嘅城市清拆中面臨著保育問題，係一時激發咗廣州嘅文化維繫同本土意識嘅思考，一路受到咗多方關注。

恩宁路 ENNING LU

性質： 一般馬路 全長： 1.115公里 行車線： 雙向2車道 地區： 廣州市荔灣區 起點： 龍津西路同埋多寶路嘅交界 終點： 第十甫路同寶華路嘅交界

中國生物多樣性保護與綠色發展基金會（綠發會）、深圳市古村之友古村落保護與發展促進中心（古村之友）等幾個社團經蒐集開發恩寧路入邊嘅多個個案資料，向廣州市中級人民法院遞交咗針對廣州市荔灣區城市更新建設項目管理中心、廣州萬科企業有限公司、中建四局第六建設有限公司等六個機構嘅訴狀，指控呢啲部門係有份破壞咗恩寧路嘅歷史街區。法院喺2021年3月尾簽收咗呢啲起訴資料，照法定程序係會喺七日內答覆係咪立案。

保育問題嘅概覽

2006年11月履職嘅中共荔灣區委書記劉平係第一個提及咗恩寧路改造，話係將會喺恩寧路「危破房改造項目」度搞啲新模式，會作為廣州市舊城改造嘅試點同未來範例。

喺2006年聖誕節召開嘅市政府某會議分組討論度，時廣州市市長張廣寧，就話荔灣（區政府）係可以考慮喺恩寧路改造工程度，試點由市、區兩級政府共同做好居民嘅搬遷安置，再請有信用嘅地產公司提出建設方案仲有實施效果，經政府審定後交由開發商建設。呢陣時廣州由1999年政府頒令「舊城改造不讓開發商參與」嘅禁制政策係開始鬆動埋。

恩寧路2014年11月經廣東省人民政府核准，納入咗歷史文化街區嘅範疇，成為埋官方主打嘅廣州歷史文化名城嘅一部分。劃定嘅文化街區範圍入邊，雖然經官方認可咗不可移動文物保護單位7個、歷史建築7個加埋傳統風貌建築31個，但係由清拆開發到建立永慶坊一路都係有著唔少嘅破壞同爭議。

破壞

根據返2021年4月左近綠發會、古村之友等整理咗嘅資料，喺恩寧路歷史文化街區嘅項目建設入邊，劃定嘅核心保護範圍同建設控制地帶都有大拆大起嘅情況發生，大量傳統風貌建築係受到咗破壞，兼且實際仲新起埋唔少嘅現代建築：

• 訂作傳統風貌建築嘅十二甫西街87、89、93號係俾人用修繕嘅名堂，未經批准而再加多或新起過其他嘅建築，拆剩正立面嘅一棟牆同連通新嘅屋宇；
• 訂作傳統風貌建築嘅恩寧路鐘巷35民居側面嘅外牆係俾人拆咗，內部嘅梯級、樓板都清拆埋，結果就同新起嘅賓館連成一體，徹底毀壞咗傳統風貌建築嘅搆成要素；
• 訂作傳統風貌建築嘅恩寧路223號、225號、231號騎樓經工程隊嘅重新修繕，外立面係明顯咁唔再啱原訂嘅保護標準；
• 訂作傳統風貌建築線索嘅恩寧路大地新街2-1號民居，俾工程隊拆剩一棟牆，破壞咗成個屋宇而且係冇法復原；
• 訂作傳統騎樓建築嘅恩寧路151、153號，俾工程隊拆剩騎樓柱同騎樓立面嘅山花，變成係重新起過咁，完全唔啱原訂嘅保育標準；
• 另包括紅線女夫婦舊居在內嘅一系列原有保護價值嘅屋宇，係俾工程隊拆嗮再跟著起過、改造成玻璃屋等現代建築。

個名

呢條馬路個名嘅來源，有兩隻講法。

出現咗五條馬路？

呢條路開始整嗰陣，由於附近有十一甫、恩寧東路、恩寧鐘巷、恩寧北路同恩寧市響度，所以就改咗「恩寧路」呢隻名。

恩頭村同寧溪村響附近？

根據專家考察過呢條路嘅歷史，原嚟呢條路嘅其中一笪地係有個恩頭村，重有一笪地係寧溪村嘅。而開始整呢條路嗰陣，就一定經過呢兩個村，所以為咗照顧好呢兩個村嘅關係，咪就改咗名嗌「恩寧路」囉。

改名風波

喺1966年嘅文化大革命嗰陣，呢條馬路就改咗名嗌「秀麗一路」，後嚟喺1981年嗰陣將個名改返轉頭，啫係依家嗌「恩寧路」。

經過嘅道路

呢度啲路嘅順序係從東南去到西北嚟排嘅，其中加粗咗嘅字係主幹道：

• 第十甫路、寶華路
• 蓬萊路
• 叢桂路
• 多寶路、龍津西路

特色

呢條路都好有西關嘅特色，因為兩邊都有騎樓響度，加上呢度重係廣州入面最完整同最長嘅騎樓街。以前呢度係西關入面最繁華嘅一笪地。