息茅夫

息茅夫（英文：Sidmouth；發音：sɪdməθ），係英國英格蘭西南部德雲郡嘅一個小城鎮。喺德雲郡嘅郡城雅息特市東南，距離大約14英里（23公里）。根據2021年嘅人口普查，呢個鎮住咗13,262人，比十年前（2011年）嘅12,569人多咗693人（0.54%）^[1]。同德雲郡嘅大部分沿海嘅城鎮一樣，息茅夫係一個旅遊度假同埋退休嘅城鎮，係其中一個退休人士鍾意嚟住嘅地方，鎮上43%居民（5,705人）喺65歲或以上，17歲或以下嘅年輕人只佔13.39%（1,776人）^[1]。居民當中，92.6%係英國出世嘅，外國移民只佔7.4%；96.9%係白人，亞洲人只佔1.36%^[1]。息茅夫亦都係侏羅紀海岸（Jurassic Coast）世界遺產嘅重要景點，鎮上大部分地區都係指定保育區（conservation area）^[2]。息茅夫嘅歷史可以追溯到史前，從息百里城堡（Sidbury Castle）遺址，可以證明息谷（Sid valley）喺鐵器時代就已經有一定數量嘅人長期住喺呢度。從 Gittisham Hill^[3] 同埋 Broad Down^[4] 嘅青銅時代嘅埋葬土堆，可以睇到呢度好可能喺青銅時代已經有人住。