才幹嘅比喻

才幹嘅比喻係耶穌講嘅一個比喻，記載喺《新約聖經》《馬太福音》第25章第14-30節、《路加福音》第19章第11至27節，係關於末日耶穌再嚟嘅一個比喻。

聖經譯文

「	天國又好比以下嘅故事：一個人要出去外國，佢叫僕人嚟，將產業交畀佢哋，佢按照佢哋各人嘅才幹，分錢畀佢哋，一個畀五千，一個畀二千，一個畀一千，然後就出國喇。嗰個領五千嘅，立刻出去做生意，另外賺咗五千；嗰個領二千嘅，亦都另外賺咗二千；不過嗰個領一千嘅，喺地下挖一個窿，將主人嘅錢埋起。過好耐，僕人嘅主人返嚟，同佢吔算賬。嗰個領五千嘅，帶住另外嗰五千，話：「主人，你畀我五千，你睇，我又賺咗五千。」主人話：「好，你個又善良又忠心嘅僕人，你喺小事都忠心，我要委託更大嘅事派你管理，入嚟同你嘅主人一齊分享快樂。」嗰個領二千嘅入嚟，話：「主人，你畀我二千，你睇，我又賺咗二千。」主人話：「好，你個又善良又忠心嘅僕人，你喺小事都忠心，我要委託更大嘅事派你管理，入嚟同你嘅主人一齊分享快樂。」嗰個領一千嘅亦都入嚟，話：「主人，我知道你係個嚴厲嘅人，你喺冇栽種嘅地方亦要收割，冇撒種嘅地方亦要收聚。我驚起嚟，所以將你嘅錢埋喺地下。你睇，你嘅錢係呢度。」佢嘅主人話：「你個又惡又懶嘅僕人，既然你知道喺冇栽種嘅地方亦要收割，冇撒種嘅地方亦要收聚，就應該將我嘅錢存入銀行，等我返嚟嘅時候，可以連本帶利一齊收返。你哋將佢嘅錢拎過嚟，畀嗰個有一萬嘅。因為嗰啲已經有嘅，要畀更多佢，等佢豐富有餘；而嗰啲冇嘅，連佢所有嘅都要奪去。至於呢個無用嘅僕人，將佢趕出去外面黑暗嘅地方，喺嗰度要喊，咬牙切齒。」	」
——《馬太福音》25章第14-30節

「	耶穌話：「有一個貴族要去遠行，為咗要得到王位，然後返嚟。佢叫咗自己嘅十個僕人嚟，交畀佢哋十個金幣，話：『你哋去做生意，直到我返嚟。』佢本國嘅百姓都好憎佢，打發使者跟住佢去，話：『我哋唔想呢個人做我哋嘅王。』佢得到王位返嚟之後，就吩咐嗰啲領過金幣嘅僕人過嚟，要知道佢哋做生意賺咗幾多。』頭一個上嚟，話：『主人，我用你嘅金幣賺咗十個金幣。』主人對佢話：『好，你係個善良嘅僕人，你既然喺最小嘅事上忠心，你有權柄管理十座城。』第二個過嚟，話：『主人，我用你嘅金幣賺咗五個金幣。』主人對佢話：『你亦都可以管理五座城。』又有一個過嚟話：『主人！睇吓，你嘅金幣喺呢度，我將佢包喺手巾度保存住。我一路都驚你，因為你係嚴厲嘅人：唔屬於你嘅，你要拎走；未有種嘅，都要去收割。』主人對佢話：『你呢個惡僕，我要用你講嘅嘢定你嘅罪。你既然知道我係嚴厲嘅人，拎走唔屬於我嘅嘢，收割我未有種嘅，點解唔將我嘅金幣存入銀行，等我返嚟嘅時候，可以連本帶利都收返呢？』於是佢對嗰啲企喺旁邊嘅人話：『將佢嘅金幣拎過嚟，畀嗰個有十個嘅。』佢哋對佢話：『主人，佢已經有十個金幣喇。』主人話：『我話你哋知，凡有嘅，要畀更多佢；冇嘅，連佢所有嘅都要奪去。至於我嗰啲仇敵，唔想我做佢哋嘅王嘅，將佢哋帶嚟，喺我面前殺咗佢哋！』」	」
——《路加福音》19章第11-27節

解釋

呢個比喻係講到「天國」嘅特性。耶穌提到有一個主人，喺出國之前，將僕人叫到佢面前，希望將佢嘅「財產」交畀僕人，由佢哋負責管理。佢想試用僕人嘅才幹，於是將錢分畀佢哋。錢分幾多就因人而異，乃係按照各人嘅才幹而分配。其中一個人分到五千，另一個分到兩千，而第三個僕人就分到一千。佢哋對呢個責任作出嘅回應，喺呢個比喻裏面佔咗重要嘅分量。第一個僕人好認真噉負起佢嘅責任，利用呢筆錢財去做生意，為咗佢哋主人嘅財富同利益而勤力做嘢。第二個僕人都照樣噉去做。呢兩個僕人都分別賺到主人分畀佢哋一倍嘅錢。第三個僕人因為懶惰嘅性格，而將主人畀佢嘅錢埋喺地下而唔去搵忠誠服事主人嘅機會。

過咗一段好長嘅時間之後，主人就返嚟。佢就同僕人算賬，要清算僕人經營佢錢財嘅結果。頭兩個僕人都過去同佢講好消息，而獲得主人嘅稱讚同獎賞。主人嘅評語係：「又善良又忠心嘅僕人。」「善良」係指佢哋已經做咗僕人應該要做嘅嘢；而「忠心」係指佢哋所做嘅係為主人嘅利益着想。至於嗰個將錢埋喺地下嘅唔忠心僕人，主人好嬲叫佢做：「又惡又懶嘅僕人」，將佢所有嘅錢都收返，並將佢趕出去外面黑暗嘅地方，呢個係佢應得嘅結果 。